Lionel Messi i kapi të gjithë në befasi, kur një javë më parë vendosi të transferohej në kampionatin amerikan “MLS League”, ku firmosi për Inter Majemin.
Kampioni i botës me Argjentinën pritet t’i bashkohet skuadrës së tij të re më 5 korrik, ndërsa debutimin me Inter Majemin në kampionatin profesionist amerikan do ta bëjë me Sharlot më 20 gusht të këtij viti. Transferimi i Lionel Mesit në kampionatin amerikan ka dhënë një efekt të menjëhershëm. Duke nisur që nga çmimi i biletave, të cilat kanë arritur në stratosferë, veçanërisht për ndeshjen e parë, që ai pritet të luajë me ekipin e tij të ri.
Siç bëjnë me dije mediat ndërkombëtare, tifozët e Inter Majemit e kanë pritur me eufori firmën e Lionel Mesit dhe janë gati të sakrifikojnë nga xhepi i tyre për të parë “live” argjentinasin në debutimin e tij me ekipin e ri. Kështu çmimi i biletave për të parë debutimin e Lionel Mesit ka arritur në 500 dollarë më e lira, teksa bileta më e shtrenjtë i kalon 1500 dollarët.
