Opozita publikoi këtë të Hënë pamje të reja të asaj që e cilëson “farsë elektorale” dhe u bëri apel qytetarëve për mosbindje civile.
Në një konferencë për mediat nga selia blu, kryetari i PD-së Sali Berisha postoi disa denoncime me video kundër parregullsive në zgjedhje. Duke komentuar pamjet për të cilat saktësoi se janë filmuar në Elbasan, ai tregoi se si persona pranë mazhorancës votuan më shumë se njëherë, votuan për persona të tjerë, diktuan votat në qendrat e votimit. Po ashtu u denoncuar parregullsi të tjera si fotografimi i votës, apo votimi familjar.
“Në serinë e farsës elektorale, unë kam sjellë këtu para jush dokumente në video, të cilat faktojnë në mënyrë të pamohueshme batërdinë elektorale që ndodhi në Elbasan, rolin prej kriminelësh elektorale të hapur të operatorëve socialistë, kontrollin e tyre të plotë mbi votën e qytetarëve, votimin e tyre për qytetarët, format e votimit jashtë të gjitha standardeve ligjore dhe kushtetuese të vendit dhe ndërkombëtare. Atë çka tregojnë kamerat në Elbasan, ajo është shëmbëlltyra e shëmtuar e këtyre zgjedhjeve”, u shpreh kreu i opozitës.
Më tej, iu drejtua me një apel qytetarëve.
“Unë ftoj shqiptarët të ndjekin këto fakte dhe dokumenta të një rëndësie jetike, për të marrë vendimin, ndoshta më të rëndësishëm të jetës së tyre, të përballemi me mosbindje civile me këtë regjim që nuk na lejon të votojmë, që kontrollon votën, manipulon votën tonë dhe është i aftë të shkelë çdo ligj, çdo vendim, në mënyrë që të grabisë mandatet e pamerituara”, tha Berisha.
Këto, shtoi ai pas përfundimit të shfaqjes së pamjeve, ishin disa video përfaqësuese të mbi 70 përqind të qendrave të votimit të kontrolluara.
“Sepse jo të gjitha janë kontrolluar dhe jo në pak raste, kamerat janë vendosur në atë mënyrë që përjashtojnë kontrollin. Është bërë vendosje kamerash që të mos filmojnë përveçse në gjunjë e poshtë votuesit. Kjo ka qenë shumë e përhapur në Kamëz, por është përdorur edhe në zona të tjera. Elbasani, rrethi i dytë më i madh pas Tiranës, është farsa më e shëmtuar elektorale, pavarësisht nga votimi dixhital që u vendos aty me qëllimin më të mirë për të shënuar një hap cilësor”, tha.
“Por Edi Ramën dhe kriminelët e tjerë elektoralë nuk i ndalon asgjë, asnjë akt, asnjë shkelje ligji, asnjë dhunim kodi, etike, norme, për të rrëmbyer mandate që nuk i takonin. Prandaj këto zgjedhje nuk njihen kurrë, shqiptarët në protestë do vendosin të drejtën e tyre legjitime, kushtetuese për të votuar të lirë, njëlloj si kombet e tjera të Europës”, paralajmëroi Berisha.
Në nisje të fjalës së tij, kreu i PD shprehu ngushëllime për ndarjen nga jeta të Silvio Berluskonit.
