Një shqiptar i shpallur në kërkim ndërkombëtar, identiteti i të cilit nuk bëhet ende i ditur, ka rënë në prangat e policisë italiane.
Shqiptari është arrestuar teksa po qëndronte në një hotel Misano Adriatico, pasi akuzohet për vrasje dhe posedim të paligjshëm të një armë zjarri.
Mediat italine shkruajnë se shqiptari është shpallur në kërkim nga autoritetet shqiptare, pasi dyshohet se është i përfshirë në masakrën e Velipojës, ku humbën jetën 4 persona.
- Ngjarja e ndodhur në 2021 mes familjes Ferracaku dhe Gocaj
Sherri mes dy familjeve nisi për shezlongat dhe përplasja me armë zjarri humbën jetën 4 persona dhe u plagosën 2 të tjerë.
Nga ngjarja mbetën të vdekur Kujtim Ferracaku 59 vjeç, pronar i hotel “Fantazia”, vëllezërit Xhovani dhe Edmond Gocaj 25 dhe 38 vjeç që kishin hotelin “Gocaj” dhe jetimi fatkeq Musaen Zeneli 20 vjeç kamerier, që e kapi një plumb në zemër dhe i mori jetën në vend.
Nga përplasja me armë u plagosën edhe Hasan Ferracaku, vëllai i biznesmenit që u vra dhe nipi i tij Elmedin Dyli.
Sipas ekspertizës, Hasan Ferracaku ka qëlluar i pari në drejtim të vëllezërve Gocaj dhe 19-vjeçarit Musaen Zeneli.
Hasani qëlloi drejt Edmond Gocajt me pistoletë duke e lënë të vdekur në vend. Vëllai i viktimës Xhovani Gocaj ka qëlluar drejt Kujtim Ferracakut duke e lënë të vdekur dhe ka plagosur edhe Hasan Ferracakun dhe Elmedin Dylin nipin e viktimës. Pavarësisht se mbeti i plagosur, Hasan Ferracaku mundi të qëllojë drejt Xhovanit duke e lënë të vdekur, madje plumbat kapën dhe kamarierin 19-vjeçar, Musaen Zeneli.
