Kryeministri i Kosovës Albin Kurti ka deklaruar se Serbia duhet të ndërpresë përkrahjen për milicinë që ka shkaktuar protesta në veri dhe se përgjegjësit duhet të ndiqen penalisht përpara se qeveria të shqyrtojë lehtësimin e qëndrimit të saj.
Në një intervistë për “Bloomberg”, Kurti tha se zgjidhja e situatës në veri nuk varet vetëm nga Kosova.
“Ne nuk mund t’i nënshtrohemi si një republikë demokratike kësaj milicie të dhunshme. Ne duam që gjërat të zgjidhen sa më shpejt të jetë e mundur, por ju e dini se kjo nuk varet vetëm nga ne”, tha ai.
Kurti i ka quajtur “të padrejta” kritikat e aleatëve dhe e ka bërë të qartë se Qeveria e tij nuk tërhiqet pavarësisht presionit në rritje nga SHBA dhe BE.
“Nuk është në rregull të bullizosh Kosovën. Sa herë që Shtetet e Bashkuara kërkojnë diçka nga ne, ne nuk pyesim pse, por vetëm kur dhe si”, shtoi ai, duke e quajtur përjashtimin nga manovrat jo të drejtë.
