Një shtetas rus u vra në një sulm peshkaqeni pranë një plazhi në vendpushimin egjiptian të Detit të Kuq – Hurghada, konfirmuan të enjten Konsullata e Përgjithshme e Rusisë në qytet dhe dy burime egjiptiane të sigurisë.
Ministria e Mjedisit e Egjiptit tha në një deklaratë të postuar në FB se një peshkaqen tigër ishte përgjegjës për vdekjen e një plazhisti, pa dhënë detaje për viktimën.
Një ekip nga ministria dhe autoritetet e tjera ishin në gjendje të kapnin peshkaqenin, thuhet në deklaratë, duke shtuar se autoritetet lokale kishin lëshuar një ndalim për notin, snorkeling dhe aktivitete të tjera sportive ujore në disa plazhe pranë vendit të sulmit.
Një zhytës që mbërriti në vendngjarje menjëherë pas sulmit tha se njerëzit kishin nxituar për të ndihmuar viktimën pasi një roje plazhi nga një hotel aty pranë ngriti alarmin, por nuk ishin në gjendje ta arrinin atë në kohë.
Agjencia ruse e lajmeve TASS raportoi se personi i vrarë ishte një rus i lindur në vitin 1999, i cili jetonte në Egjipt prej pak muajsh dhe nuk ishte turist.
Në një deklaratë të postuar në kanalin e saj zyrtar në aplikacionin e mesazheve Telegram, konsullata u bëri thirrje turistëve rusë të jenë vigjilentë kur janë në ujë dhe t’i përmbahen rreptësishtë çdo ndalimi të notit të vendosur nga autoritetet lokale.
Një video e publikuar në rrjetet sociale tregon pamjet dramatike kur viktima sulmohet në ujë nga peshkaqeni.
Hurghada, prej disa vitesh tashmë, është një ndër destinacionet popullore që ofrojnë operatorët turistikë në Shqipëri.
