Prokuroria e Posaçme kundër Korrupsionit dhe Krimit të Organizuar, SPAK ka nisur hetimet për nxjerrje të sekretit hetimor në lidhje me arrestimin e Vangjush Dakos dhe zyrtarëve të tjerë.
Sipas të dhënave paraprake, Prokuroria e Posaçme kundër Korrupsionit dhe Krimit të Organizuar, mbi bazën e verifikimeve të kryera kryesisht, ka filluar hetimet për kryerjen e veprës penale ”Zbulimi i akteve ose të dhënave sekrete”, të parashikuar nga neni 295/a i Kodit Penal.
“Fillimi i hetimeve kryesisht për këtë vepër penale është bërë për shkak të zbulimit ndaj të tretëve të të dhënave dhe të përmbajtjes së akteve procedurale, të cilat përbëjnë ”sekret hetimor”, që lidhen me veprimet procedurale të paraqitjes dhe të shqyrtimit të kërkesës me objekt caktimin e masave të sigurimit në ngarkim të shtetasve Vangjush Dako etj, të kryera në kuadër të procedimit penal nr.197 viti 2020 të Prokurorisë së Posaçme. Objekt i hetimeve do të jenë veprimet e të gjithë personave të përfshirë në kryerjen e veprimeve procedurale për caktimin e masave të sigurimit për procedimin penal nr.197 viti 2020, duke përfshirë funksionarët e drejtësisë, personelin administrativ të organeve procedurale, si dhe çdo person tjetër që ka marrë dijeni për veprimet procedurale për shkak të funksionit të tij, të cilët mundet të kenë zbuluar të dhënat sekrete ndaj personave të tretë,”-shkruhet ndër të tjera në njoftimin e SPAK.
Por pse dyshohet se është “prishur” sekreti hetimor?
Prej një jave tashmë, në të gjithë rrethin e gazetarëve është folur për një arrestim të bujshëm, të cilin kanë lënë të kuptohet se është për ish-kryebashkiakun Vangjush Dakon.
Gazetarët e kronikës kanë bërë disa statuse në rrjetet e tyre sociale, duke nënkuptuar se prisnin ditën e arrestimit. Por po ashtu, një tjetër element i dyshimtë është fakti se në media u raportua lajmi se Dako ishte vetëdorëzuar, i shoqëruar nga avokati i tij në Policinë e Tiranës.
Madje u vendos edhe një mburojë për të mos e bërë objektiv të kamerave që ishin mbledhur para godinës kryesore të “bluve” të vendit. Të gjitha këto të dhëna kanë ngritur dyshimet se diku në SPAK ka “rrjedhje” të informacioneve. Ndaj edhe ka nisur hetimi.
