Disa urdhër-arreste janë lëshuar për ish-zyrtarë të Bashkisë së Durrësit, mes tyre edhe për Vangjush Dakon.
Sipas burimeve pranë SPAK, janë 10 masa arresti të kërkuara nga Prokuroria e Posaçme dhe të miratuara nga Gjykata për akuzat e shpërdorimit të detyrës, dhe falsifikimit të dokumenteve. 7 prej tyre janë masa sigurie “arrest në burg” të dhëna në mungesë, ndërsa tre të tjerat më të buta.
Informacionet janë paraprake dhe një njoftim pritet nga Prokuroria e Posaçme, si organi drejtues i hetimeve, lidhur me zhvillimet.
Dako është marrë në pyetje në SPAK disa ditë më parë. Ai ka qenë në ambientet e Prokurorisë së Posaçme edhe në muajin Mars. Asokohe burime thanë se ai u pyet për një objekt që ka ndërtuar tre kate pa leje, të legalizuara më pas. Objekti më pas pësoi dëmtime të konsiderueshme nga tërmeti i 26 nëntorit 2019. Për çështjen ka pasur një kallëzim më herët.
Burime thonë se urdhër-arrestet që po ekzekutohen këtë të Martë kanë lidhje pikërisht me këtë rast.
Sipas burimeve, Dako akuzohet dhe për një procedurë tenderimi. Kallëzimi për parregullsi në këtë tender është bërë nga Kontrolli i Lartë i Shtetit, që ka përllogaritur se në këtë rast, shtetit i është shkaktuar një dëmin prej 180 milionë lekësh të vjetra.
Emri i Vangjush Dakos doli edhe në përgjimet e dosjes 339, që zbuluan lidhjen e zyrtarëve të lartë me persona me precedentë të theksuar kriminale me qëllim shit-blerjen e votave apo ndikim në zgjedhjet parlamentare të 2017-ës. Hetimet për çështjen e krimit zgjedhor u ndanë më tej nga akuza në fraksion të dosjes 339, megjithatë ndaj asnjë zyrtari nuk janë ngritur akuza penale, deri më sot.
Ish-kryebashkiak i Durrësit për tre mandate ka mohuar të gjitha akuzat ndaj tij. “Jam i pastër, jam akullore”, do të deklaronte ai në një emision televiziv disa vite më parë. Ndërkohë, sipas Departamentit Amerikan të Shtetit që e ka shpallur person “non grata”, Dako “ka qenë i përfshirë në korrupsion gjatë mandatit të tij si kryetar i Bashkisë së Durrësit”.
Urdhër-arrestet e tjera
Po ashtu, një ndërtues është mes 10 personave ndaj të cilëve është lëshuar urdhër-arrest lidhur me hetimet që çuan në pranga ish-kryebashkiakun e Durrësit Vangjush Dako.
Ai është Fiqiri Faruku, ndërtuesi i pallatit që u shemb nga tërmeti i 2019-ës, ku sipas hetimeve të SPAK, u ndërtua pa leje.
Ndaj tij, si dhe ndaj inxhinieres së firmës që Faruku zotëron, është lëshuar masa e sigurisë së arrestit me burg.
E njëjta masë është lëshuar dhe për 4 ish-zyrtarë të Bashkisë së Durrës.
Ndërsa për tre prej tyre, është dhënë në mungesë masa e arrestit shtëpiak.