Apeli i Gjykatës së Posaçme kundër Korrupsionit lë të pandryshuar masën e sigurisë “arrest në burg” për kryebashkiakun e zgjedhur të Himarës, Alfred Beleri.
Ndërsa, Pandeli Kokaveshi (pjestar i ekipit të fushatës së Belerit) është liruar pasi Apeli i GJKKO-së vendosi për të masën e sigurisë “detyrim paraqitjeje.” Sipas avokatit Marsel Zhupa, klienti i tij Kokaveshi ka bërë para një viti transplant zemre dhe nuk mund të qëndronte në paraburgim për shkak te nevojave specifike mjekësore.
Beleri u arrestua dy ditë përpara zgjedhjeve të 14 majin për korrupsion aktiv në zgjedhje të kryer në bashkëpunim, ndërkohë që nga qelia, arriti të shpallej fitues në garën për Bashkinë e Himarës përballë Jorgo Goros së PS, me një rezultat të ngushtë.
Sipas policisë, Beleri dhe Kokaveshi kanë premtuar dhe dhënë shuma monetare me qëllim blerjen e votës. Avokati i Belerit ndërkohë, i ka cilësuar akuzat politike dhe ka deklaruar se prokuroria s’ka prova për të mbështetur akuzat.
Fillimisht hetimet ndaj Belerit u kryen nga prokuroria e Vlorës, ndërsa gjykata e rrethit vendosi që t’ia kalojë për kompetencë dosjen Prokurorisë së Posaçme. Si Gjykata e Vlorës, ashtu dhe GJKKO dhe sot Apeli kanë vendosur masën e sigurisë së arrestit me burg ndaj fituesit të zgjedhjeve për Bashkinë e Himarës.
Arrestimi i Belerit ka sjellë përplasje mes qeverisë Rama dhe Athinës zyrtare, që ka deklaruar se nëse arrestimi i Belerit është kryer pa prova – siç shprehet mbrojtësi i tij ligjor – atëherë kjo do të përbënte një skandal. Ish-kryeministri grek Mitsotakis është shprehur se prangosja e Belerit, i cili është përfaqësues i minoritetit grek në Shqipëri, mund të sjellë ndryshim të qëndrimit të Athinës duke penguar integrimin e Shqipërisë në BE.
