Gjykata e Tiranës, ka ndryshuar masën e sigurisë për ish-sekretarin e Përgjithshëm të Ministrisë së Fianacave Arlind Gjokutaj. Nga “Arrest në shtëpi”, për të është vendosur që të vijojnë hetimet në “Detyrim paraqitje”.
Gjokutaj u arrestua për akuzën e shpërdorimit të detyrës. Nga hetimet e prokurorisë së Tiranës ka rezultuar se, përmbaruesi privat Alban Ruli në kundërshtim me ligjin, ka bërë rivlerësim të dëmshpërblimit për një pronë ne emër të Ilir Thanës edhe pse ky i fundit nuk rezultonte zotërues i një magazine me sipërfaqe 187 metra katror pasi ajo iu kthye ish-pronarit në vitin 1995-së.
Por sipas prokurorisë, në harkun kohor të tre muajve, duke nisur nga gushti i kaluar deri në tetor, Ministria e Financave në kundërshtim me ligjin, ka pranuar për të ekzekutuar titullin përmbarimor duke derdhur në llogari të Thanës dhe motrës së tij shumën prej 480 milionë lekë të vjetra, ndërsa pjesa tjetër prej rreth 980 milion lekësh të vjetra do të lëvrohej më vonë.
Pas arrestimit Gjokutaj u shtrua në spital për shkak të gjendjes shëndetësore ndërkohë që Apeli i Tiranës i ndryshoi masën nga “Arrest në burg” në “Arrest shtëpie”.
Ndërkohë në “Arrest shtëpie” vijojnë të qëndrojnë Alban Ruli përmbarues privat dhe Fatmir Hoxha drejtor juridik në Ministrinë e Financave. Hetimet për këtë çështje janë drejt përfundimit dhe pritet që dosja të kalojë me kërkesën për gjykim në Shkallën e Parë.
Lexo edhe:
Tre në pranga për shpërdorim detyre, mes tyre Sekretari i Përgjithshëm i Financave
Dosja/Rryshfet 82 mln lekë sekretarit të MF, Ilir Thana tërhiqte çdo ditë 1 mln lekë
Pranga Arlind Gjokutaj/ Historia e pronës, nisi me burg në ’44, sërish burg në 2023
