Mjetet e ekipeve mediale që po raportojnë nga Leposaviqi, janë sulmuar mesditën e kësaj të Hëne.
Disa nga mediat që janë sulmuar janë “Kallxo”, “RTV Dukagjini” dhe “Top Channel”.
Asociacioni i Gazetarëve të Kosovës ka dënuar sulmin dhe ka dalë me një reagim zyrtar.
Përmes një reagimi në Facebook, AGK kërkoi nga organet ligjzbatuese kujdes të shtuar për të u siguruar punë të sigurt gazetarëve në raportim nga veriu.
“AGK-ja, e dënon këtë akt të protestuesve, njëherësh u bën thirrje Policisë së Kosovës dhe prezencës ndërkombëtare në Kosovë, që të mundësojnë raportim të sigurt dhe të papenguar të ekipeve mediale”– thuhet në reagim.
“Vandalizohen dhe dëmtohen veturat e RTV Dukagjinit dhe KALLXOs në Leposaviq. Veturat e RTV Dukagjinit dhe të KALLXOs, janë vandalizuar dhe dëmtuar nga protestuesit në Leposaviq” – thuhet tutje në reagim.
Ndërkohë edhe mjeti i ekipit të Top Channel, u sulmua nga serbët, duke u shkruar në to simbole nacionaliste serbe e madje iu janë hequr edhe targat.
Protestuesit serbë kanë hedhur edhe bojë të zezë mbi xhamin e përparëm të automjetit.
Ndërkohe, organizata që mbron dhe promovon të drejtat e gazetarëve kërkoi nga gazetarët që të tregojnë kujdes të shtuar gjatë raportimit.
