Gjykata e Rovigo-s, Itali, ka dënuar me 14 vjet e 6 muaj burg Nadire Kurtin. Ajo vrau vitin e kaluar bashkëshortin e saj, Shefki Kurtin, 72 vjeç.
69-vjeçarja e copëtoi trupin e pajetë të bashkëshortit dhe pasi e futi në disa qese e hodhi në një kanal.
Gruaja e pranoi krimin më 18 Gusht të vitit të kaluar. Ajo pohoi se kishte përdorur një hanxhar dhe disa thika. Pjesët e trupit u gjetën fillimisht më 28 Korrik. Gjithçka ndodhi si pasojë e tharjes së kanalit.
Prokurori shpjegoi se brutaliteti i këtij krimi i kishte bërë hetuesit që të mendonin pista të tjera fillimisht. Në fakt së pari u fol për një lidhje me krimin e organizuar. Por më vonë u zbulua se bëhej fjalë për probleme familjare.
Më vonë u zbulua se Nadirja kishte probleme psikologjike. Prej vitesh ajo ndiqej nga një psikiatër. Po ashtu, ajo ishte e shtruar në psikiatri në Gusht të vitit të kaluar për simptoma të çrregullimit të personalitetit.
