Gjykata e Tiranës ka caktuar masën “Arrest me burg”, për Milena Derajn, e arrestuar për mashtrim në vlerë qindra-mijëra euro.
Prokuroria ka dokumentuar të paktën 2 raste ku ish-ekonomistja e Bankës së Shqipërisë ka përfituar përmes mashtrimit një shumë totale prej 570 mijë eurosh.
Ajo përfundoi në pranga pas kallëzimit të mikes saj, Elira Shyti, e cila i kishte dhënë një shumë parash në kohë dhe vlera të ndryshme, dhe i premtonte se gjatë kësaj kohe do t’i investonte në bono thesari që kapnin vlerën e 225 mijë euro. Dy transaksione 40 dhe 20 mijë euro ishin bërë përmes një banke të nivelit të dytë, ndërsa pjesën tjetër dorazi.
Kjo shumë parash, pretendon kallëzuesja, nuk i është kthyer kurrë dhe në asnjë formë. Kjo e fundit është ankuar te bashkëshorti i Derajt, Genc Llakaj që punon në kryeministri, teksa ai ka pretenduar se nuk ka pasur dijeni.
Një skemë të ngjashme Deraj ka përdorur edhe ndaj familjes Verracaku nga Shkodra, prezantim të cilin mes tyre e kishte mundësuar Elira Shyti, me argumentin se mund t’i ndihmonte në procesin gjyqësor në të cilin po zvarriteshin prej disa kohesh. Familja Verracaku ka pranuar Derajn si person “me ndikim” dhe kanë rënë dakord duke dhënë Derajt para herë pas herë, me vlerë totale 340 mijë euro.
Por pavarësisht kësaj, në çështjen gjyqësore nuk kishte asnjë përparim që prisnin pavarësisht premtimit, dhe nisën t’i kërkojnë sqarime Derajt, por kjo e fundit gjente pretekste të ndryshme, ç’ka ngriti edhe dyshime.
Milena ra vetë në rrjetën e drejtësisë pasi kallëzoi Abedin Verracakun me pretendimin se e kërcënonte në rrjetet sociale. Por thellimi i hetimeve dhe kallëzimi i mikeshës saj, zbardhi dinamikën dhe skemën e mashtrimit. Nga ana tjetër, tre anëtarë të familjes Verracaku janë shpallur në kërkim për vetëgjyqësi. Deraj u tha anëtarëve të familjes Verracaku se avokati u ka thënë se me provat që ka prokuroria të akuzuarit, anëtarë të familjes, mund të lirohen nga burgu, por nëse japin 340 mijë euro i shpëtonte nga burgimi i përjetshëm, me kërkesën për gjykim të shkurtuar.
