Pas penalltisë së diskutueshme në ndeshjen e djeshme me Bylisin që i hoqi vendin e parë në Superiore Tiranës, një tjetër goditje vjen për kryeqytetasit.
Një ditë pas takimit me një arbitrim tepër të diskutueshëm, Komisioni i Disiplinës në FSHF përjashton me disa ndeshje disa prej lojtarëve të Tiranës, kur ka mbetur vetëm një ndeshje nga mbyllja e kampionatit.
Po ashtu, Komisioni i Disiplinës ka dënuar skuadrën e Tiranës me zhvillimin e ndeshjeve pa tifozë për 90 ditë pas tensioneve të një dite më parë gjatë ndeshjes me Bylisin.
Disiplina ka dënuar me gjobë prej 100.000 lekë, lojtarin e KF Tirana, Visar Bekaj, për nxitje të urrejtjes dhe akteve të dhunës. Dënime me pezullime nga të gjitha aktivitetet janë dhënë edhe për disa lojtarë të tjerë të Tiranës.
Konkretisht, gjashtë lojtarë dhe dhe tre pjesëtarë të stafit janë pezulluar nga 4 ndeshje deri në 2 vite pezullim. Visar Bekaj, Albano Aleksi, Aldi Gjumsi, Bruno Lulaj, Besir Iseni, Florent Hasani, Arzen Vocaj, Kostandinos Jani dhe Marvi Kastrati janë ndëshkuar nga Disiplina si përgjegjës për ngjarjen e ndodhur në fundin e ndeshjes me Bylisin.
Në përfundim të ndeshjes që u mbyll në barazim 2-2, krahas protestave të lojtarëve, shumë tifozë dhe persona të paidentifikuar u futën në fushë, duke rrethuar gjyqtarët dhe zyrtarët e ndeshjes.
Besir Iseni është lojtari që ka marrë masën më të lartë të ndëshkimit, duke u pezulluar për 24 muaj, ose e thënë ndryshe për 2 vite. Me dorë të hekurt është ndëshkuar dhe portieri Visar Bekaj, të cilit i ndalohet aktiviteti për 12 muaj (1 vit).
Me nga 6 ndeshje pezullim janë dënuar Albano Aleksi, Aldi Gjumsi dhe Bruno Lulaj, ndërkohë që për 4 ndeshje nuk do të jetë i gatshëm Florent Hasani. Me nga 8 ndeshje janë pezulluar dhe Vocaj, Kostandinos Jani dhe Marvi Kastrati, pjesëtarë të stafit mjekësor.
Kështu, në ndeshjen e fundit të kampionati dhe në finalen e Kupës së Shqipërisë, Tirana duhet të luajë pa gjysmën e skuadrës.
Lexo edhe:
Penalltia dhe dënimi nga FSHF, Tirana hedh akuza për manipulim të ndeshjes – VIDEO
