Kryetari i PD-së, Sali Berisha dha një mesazh bashkëpunimi këtë të enjte për deputetët demokratë kritikë me të.
Në një emision televiziv, Berisha tha se vlerëson deputetët që mbështetën kandidatët e primareve në zgjedhjet lokale apo nuk bënë anti-fushatë për ta. Përjashtim bëri për Enkelejd Alibeajn dhe Lulzim Bashën, të cilët i quan vegla të kryeministrit Edi Rama.
“Kam një mesazh që ta marrim të sinqertë nga mua. Vlerësoj qëndrimin që u mbajt ndaj kandidatëve të primareve. Nuk them që çështja e Sali Berishës për ‘non grata’ nuk i pëlqen atij (i referohet një deklarate të Gazmend Bardhit që u transmetua në emision), por problem është që shqiptarëve u pëlqen Sali Berisha. Gjysmë milioni, se analizat duhet të bëhen me kthjelltësi. Në këtë fushatë Berisha kandidoi pa logo, pa emër dhe ja ku u arrit. Shqiptarët e thanë fjalën e tyre. Natyrisht debati brenda partisë është i shëndoshë dhe unë mbetem i hapur për të diskutuar dhe për të marrë vendimet më të mira për PD”, tha Beriha në “Çim Peka Live”.
Ai konfirmoi se negociata s’ka, por shtoi se “në çdo kohë mund të diskutohet me ta”. “Jemi të hapur për të diskutuar me ta dhe marrë një proces që është interesi më i mirë i opozitës, më i mirë i vendit”, tha.
