Kreu i Partisë Demokratike, Sali Berisha ka kërkuar me urgjencë që të ngrihet Komisioni Hetimor për atë që e cilësoi “masakër elektorale”.
Kryedemokrati mesditën e sotme në selinë blu zhvilloi mbledhje me grupin parlamentar të Partisë Demokratike, duke denoncuar kryesisht rastet për blerjet e votës. Gjithashtu Berisha tha se bandat për vjedhjen e votës u dërguan nga Dubai kurse kriminelët u liruan nga qelitë.
Sakaq Berisha solli në vëmendje shpërblimin që iu dha pensionistëve, por edhe rritjen e rrogave. Berisha po ashtu u shpreh se është ushtruar një terror i egër policor dhe nga administrata e shndërruar në polici politik.
“Ne kemi vendosur dhe do të ndjekim rrugën ligjore. Pa asnjë lloj reflektimi tjetër përveç atij se shprehu Rama se kodi zgjedhor është kinezëri për KZQ, për gjykatën që nga ngritur. SKAP-i i partisë është institucioni më i skllavëria, çdo padi e jona është hedhur poshtë me absurditet pa asnjë bazë ligjore nga SKAP-i i partisë, Për të rëndësi ka urdhri i Ramës dhe jo Kushtetuta apo Kodi Zgjedhor.
Marrim rastin e blerjes së votës, SKAP-i thotë kjo lejohet në zgjedhje lokale sepse kështu ka thënë KQZ. A ka dhunim flagrant të ligjit se sa ky? Kushtetuta kurrë nuk mund të ndajë vlerën e votës për zgjedhje të përgjithshme apo për zgjedhje lokale. Të gjitha çështjet e dërguara janë kthyer mbrapsht pasi porosia është e prerë, ata mund të jenë vetëm mburojë e narkoshtetit karteleve të drogës dhe bandave të tyre.
Duhet me urgjencë të përgatisim kërkesën për Komision Hetimor Parlamentar për këtë farsë më e turpshmja elektorale në historinë e Europës. Ne po përgatisim raportin, bota e krimit u vërsulet qendrave të votimit. Pati lirime nga burgu, u përdor vota e të burgosurve për të marrë mandate, burgje që votonin 100% njësoj si në diktaturë. Në burgun e grave në Tiranë 45% e votave për hajdutin Veliaj. Ulsi Manja është një kriminel elektoral, ka përdorur administratën e burgjeve. Në krye të krimit qëndron Salillari me Rrok Gjokën.
Salillari është kapur në flagrancë me blerje votash. Rrok Gjoka merr në patronazh qendër votimi në Bulqizë dhe ndërhyn fuqishëm. Belinda Balluku ka terrorizuar zonën, në takimet e saj, ajo ndante qendër votimi me biznes. Janë përdorur forma të ndryshme. Në Klos demokratët e kapën tjetrin në makinë që mbante para, policia e fshihte kriminelin elektoral. Në Librazhd ndihmat ushqimore ndaheshin haptas, liheshin në supermarkete nga ish-shoferi i Taulant Ballës. Bandat në qytetet e mëdha u hodhën në një sulm të egër, të gjitha në regjinë e Edi Ramës”, tha Berisha.
- Manipulimi i zgjedhjeve/ Berisha: Për herë të parë vota u ble me vendim qeverie!
Gjatë fjalës së tij, Berisha u ndal tek manipulimi i zgjedhjeve të 14 majit, që sipas tij ishte një farse elektorale. Në fjalën e tij në mbledhjen e grupit parlamentar të thirrur nga vetë ai u shpreh se për herë të parë vota u ble me vendim qeverie.
“Për grupin parlamentar të PD-së, për deputetët e opozitës, çështja e parë ose kryeçështja e këtij sesioni duhet të jetë farsa elektorale maj 2023. Kjo farsë elektorale ishte një proces, një etapë e re në procesin e shkatërrimit të kombit shqiptar. Asnjë komb, historia ka faktuar se nuk zhvillohet pa liritë, të drejtat e tij themelore.
Në këtë kontekst, target ose objektiv kryesor për realizimin e këtij qëllimi është dhunimi i votës së lirë. Ky dhunim është seria, por ky dhunim siç faktuan këto zgjedhje, njohu përmasa më të mëdha se kurrë ndonjëherë. Në këto zgjedhje, si në asnjë palë zgjedhje të tjera në 32 vite, Kodi Zgjedhor, Kushtetuta e të drejtës zgjedhore, u shpall në krye të radhës kinezëri nga njeriu që do udhëhiqte operacionin e narkoshtetit dhe të karteleve të drogës kundër procesit të zgjedhjeve të lira për popullin e vet.
Për herë të parë ju mund të riktheni në memorie, studio dhe debate televizive ku njerëz me sy të mendjes së verbuar bënin çdo gjë që të fshinin dhe maskonin blerjen masive të votës për herë të parë, haptas publikisht me vendime qeverie.
Propagandë qeveritare ia doli, imagjonini në një anë 670 mijë zarfa me 50 mijë lekë secila në xhepin e 670 mijë votuesve. Rritja e rrogave, qenkan 310 mijë punonjës. Të gjithë këta së bashku së marrë bëjnë 980 mijë zgjedhës. Në anën tjetër fajin e ka Sali Berisha. Po ka njerëz më padinjitet sesa këta. Ka mercenarë më të shpifur. Ka pseudointelektuale më mjeranë se këta, të cilët duhet të mbrojnë në një mënyrë ose tjetër interesin publik.
Unë i ndala në këtë aspekt sepse këto zarfa ishin publik. Rama për herë të parë kaloi në shpërndarje publike parash. Po për aspektin nën dorë, nuk bëhet fjalë. Duan të bindin shqiptarët se fajin e ka Berisha dhe opozita. Çfarë po ndodh tjetër? Gjithçka drejtohet nga Edi Rama, është ushtruar një terror i egër policor dhe jo vetëm policor por edhe nga administrata e shndërruar në polici politike”, tha Berisha.
