Nga Boldnews.al
Pa u mbushur dy javë nga zgjedhjet lokale, deputetët u mblodhën për të trajtuar një çështje shumë të rëndësishme: rritjen e pagave të tyre. Diskutuan gjatë, hodhën e pritën dhe të gjithë ishin të mendimit se pagat duhet të kishin një hierarki sipas rëndësisë së postit. E nisën me presidentin që ja mbushën goxha kuletën, më pas me kryeministrin, i cili vërtetë nuk ka kërkuar gjë për vete, por i vinte zor, ku kohët e fundit edhe për të blerë lapsa për të pikturuar nuk kishte para.
Kabineti qeveritar i gjithi kishte dhënë shenja se kriza i kishte prekur thellë. Ministrat në përgjithësi po shfaqen prej të paktën dy vitesh të parruar. Në fillim femrat e show bizit diskutonin se mund ta mbanin leshin në fytyrë për modë, por në fakt ata nuk kishin para as për të blerë brisqe. Pa harruar se me shpenzimet e tyre kryenin fushatë dhe herë pas here në zonat ku takonin qytetarët shihnin sesi edhe në fshatrat më të thellë krekoseshin nga pasuria e vendosur. Madje ministrave të deleguar në bashki të ndryshme të vendit nuk u dilnin paratë as për pilaf, e jo më paçe koke. Ministrat për vete porosisnin ndonjë kafe, duke iu thënë kamarierëve të xhelatuar dhe veshur shtrenjtë: “ma mbushni edhe një gotë ujë depozite”. Aq keq i kishte dërmuar kriza në këto vitet e fundit.
Ministreshat gjithashtu e lëshuan ca veten, shihnin me ëndje klinikat estetike dhe parfumet e shtrenjta në internet, por aq guxonin të porosisnin, paga nuk u dilte. Mbanin edhe shumë halle të tjera të familjes, ku fëmijët e ministreshave nuk blinin dot një patatinë në kioskat e shkollave shtetërore, burrat e papunë të ministreve shfrynin e shtynin kohën në lokalin e lagjes me ndonjë kafe apo teke raki që ua jepnin kryesisht pensionistët që iu ishte rritur me kohë pensioni dhe u dilte për të ngrenë, pirë, shëruar në klinika private, madje pronotuar edhe pushime në Dubai.
Në hall sa nuk ka ku shkon ishin edhe 140 deputetët e Parlamentit të Shqipërisë. Prej kohësh shfaqeshin gati në depresion ku shfrynin sikletin e pamundësisë ekonomike në foltoren e kuvendit. Në fund deputetët menduan edhe për veten, duke e rritur pagën e cila hyn në fuqi që me një prill. Në llogaritë bankare të qershorit do të kenë të shtuar pagën dhe mund të lajnë edhe borxhet që ua kanë marrë kryesisht qytetarëve të pasur dhe mbi të gjitha pensionistëve të majmur nga rritja e çmendur e pensioneve. Një pensionist merr mesatarisht 11 mijë lekë në muaj. Për ta del e tepron…
Sipas projektligjit për “Kompetencat për caktimin e pagave” deputetët përfitojnë rritjen më të madhe me 98 për qind, duke e çuar pagën bruto me 310,250 lekë nga 156,777 lekë që është aktualisht. Paga e ministrave rritet me 82 për qind, duke shkuar në 310,250 lekë në muaj nga 174,760 lekë që ishte më parë. Rritje me mbi 72% pësoi edhe paga e kryeministrit dje Kryetarit të Kuvendit, ndërsa paga më e lartë në vend ajo e Presidentit që është në krye të hierarkisë së pagave arriti me 425.000 lekë nga 257, 000 lekë që është aktualisht me rritje 65%. E meritonin. Tashmë ministrat mund të rruhen, ministreshat mund të lyhen, e kryeministri ka para për të blerë lapsa, bojë dhe kanevacë për pikturat e tij. E meritonin këtë rritje, sidomos tani pasi zgjedhjet përfunduan.
