Pesë ditë pas rezultatit të zgjedhjeve lokale të 14 Majit, kur të gjithë janë duke bërë llogaritë për rezultatin e tyre dhe partitë kalojnë veten në skaner për të gjetur se çfarë nuk shkoi siç duhet, Grida Duma ka folur për situatën e krijuar brenda PD-së.
Ish-deputetja demokrate që tashmë i komenton situatat nga posti i moderatores në “Më lër të flas” ka shprehur qëndrimin e saj për garën e Tiranës, ku Erion Veliaj fitoi përballë Belind Këlliçit.
Duke e vendosur vetën në rolin e kryetares së PD, Duma tha se për Tiranën do t’i kishte ofruar qytetarëve një alternativë më pak politike, duke marrë shembullin e mjekut Halim Kosova.
“Unë ia thashë Erjon Veliajt këtë gjë kur e kisha, që sot nuk ka ende një figurë politike, me aq shumë mjete që të jetë thelbësisht politike që të dalë përballë tij. Unë strategjikisht do të kisha nxjerrë një figurë jo kaq politike. Halim Kosova, pavarësisht se PD-ja i kishte humbur zgjedhjet, sikurse e quante Rama në 2013, ishte prestigjioz në garë”, u përgjigj ajo.
Ndërkohë, pyetjes se “pse nuk e kemi këtë garë tani?”, Duma iu përgjigj duke vendosur theksin te dy aktete e paprecedenta politike që ndërmori Lulzim Basha si kryetar i PD, duke djegur mandatet dhe duke mos hyrë në zgjedhjet e 2019.
“Sepse, me marrjen e vendimeve jo strategjike, kur ti lë mandatet, lë bashkitë në 2019, çfarë do që të bësh, nuk bën dot kuaj fitoreje që të mbështeten në potenca të mëdha të partisë”, tha Duma.
Sipas moderatores së “Top Story”, nëse do të kishte vullnet, e djathta ka mundësitë të hyjë në garë që nesër.
“Mund të hyjë edhe nesër, po të dojë. Kapacitetet i ka aty. Çështja është kush do të jetë formula e kontraktualitetit”, nënvizoi Duma.
