Koalicioni “Bashkë Fitojmë” ka ankimuar në KAS vendimin e KQZ-së që miratoi tabelën përmbledhëse për zgjedhjen e kryebashkiakut nga lokalet e 14 majit. Bashkë Fitojmë kërkon rinumërim votash për 10 qendra votimi në total në Bashkinë e Kuçovës, 2 në Lumas dhe 8 në qytet.
Në ankimin e koalicionit të opozitës renditet një sërë shkeljesh që sipas “BF” kanë ndodhur më 14 maj. Mes tyre janë problemet me kamerat e sigurisë, probleme me pajisjen elektronike të identifikimit, votimet në grupe, fshehje të vulave, dëmtim dhe vulosje të gabuara, mosrakordime në numër votash, kërcënime dhe dhunë psikologjike ndaj vëzhguesve të koalicionit “Bashkë Fitojmë”, etj.
Më herët, kandidati i koalicionit opozitar për Kuçovën, Lefter Maliqi ka denoncuar publikisht se zgjedhjet ishin të manipuluara dhe votat janë blerë masivisht nga mazhoranca. Mes personave që Maliqi ka denoncuar për blerje masive votash është biznesmeni i afërt me qeverinë, Pëllumb Salillari.
Maliqi ka depozituar edhe në SPAK një kallëzim.
“Jam i bindur se këtu ka krim shtetëror dhe krim elektoral. Janë hedhur miliona euro për të blerë votat në bashkinë e Kuçovës”, tha Lefter Maliqi.
