Policia ka arrestuar një 32-vjeçar që tentoi të vidhte zyrën postare të fshatit Gorre në Lushnje. Në pranga ka përfunduar shtetasi Spiro (Andrea) Gjini me precedent penal të mëparshëm në fushën e vjedhjeve.
Ditën e djeshme, Gjini ka thyer derën e zyrës postare në këtë fshat dhe ka tentuar të vjedhë shumën e parave që ishin në këtë zyrë.
“Specialistët për Hetimin e Krimeve të Komisariatit të Policisë Lushnjë, pas njoftimit të marrë për një tentativë vjedhjeje në zyrën postare, kanë shkuar menjëherë në vendngjarje, si dhe kanë organizuar punën me qëllim identifikimin dhe arrestimin e autorit të këtij rasti.
Nga veprimet e shpejta operacionale, u arrestua shtetasi S. (A). GJ., 32 vjeç, banues në fshatin Gorre, Lushnjë, pasi dyshohet se ditën e djeshme, ka thyer derën e zyrës postare në këtë fshat, ka tentuar të vjedhë shumën e parave që ishin në këtë zyrë, por nuk ka arritur ta kryejë vjedhjen.“- njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme, për veprën penale “Vjedhja”, mbetur në tentativë.
