Kryeministri Edi Rama ashtu siç kishte premtuar në deklaratën për mediat pas fitores në zgjedhjet lokale të 14 Majit, ka vizituar Shkodrën të parën, nga 53 bashkitë që PS fitoi në këto zgjedhje.
Në kuadër të një turi falënderues që do të zhvillojë në të gjithë vendin, Rama së bashku me Elisa Spiropalin dhe ministren Edona Bilali u panë në krah të Benet Becit duke shëtitur në rrugët e qytetit.
Gjatë vizitës, Rama është takuar me qytetarët, me këshilltarët e rinj socialistë të Këshillit Bashkiak, si dhe ka ndjekur një ndeshje basketbolli.
Ndalesën e parë, Rama e bëri në Muzeun e Memories, nga ku i komunikoi Becit edhe një mesazh në lidhje me votëesimin që i bëri sipas tij Shkodra më 14 Maj, nisur edhe nga eksperiencat e mëparshme elektorale të kryeministrit.
Rama ia bëri të qartë Becit se “Shkodra zemrën e ka djathtas” dhe se duhet të punojë fort për të arritur një fitore tjetër pas 4 vitesh, pasi qyteti për herë të parë votoi me mendje dhe kjo nuk do të përsëritet.
“Nuk e di çfarë ka bërë por do të kesh presion të madh duhet që ta mbash atë, duhet të bësh një bashki për të gjithë qytetarët e Shkodrës nëse do që të mbështesin siç të mbështetën sepse një herë mund të fitosh, por të përsërisësh fitoren është e vështirë. Një gjë duhet që të dish nga unë, se sa herë që kam ardhur këtu duke kërkuar vota kam ngrënë shpulla. Këtë herë të kanë fituar me mendje jo me zemër, zemrën nuk ta japin se e kanë djathtas si puna jote, por tua marrësh e tua vendosësh në qendër. Në fushatë që ti e konsidero pjesën më të vështirë është më e lehtë në zyrë është më e vështirë, janë vendimet që të takojnë ty dhe të marrësh vendimet e duhura duhet që të dish të thuash jo”, tha Rama.
