Deputetja demokrate, Ilda Dhori në një lidhje skype me MCN Live ka komentuar lidhur me humbjen e thellë që pësoi PD në zgjedhjet e 14 majit ku u shpreh se nuk kanë qenë mjaftueshëm të besuar për qytetarët dhe se sot opozita është e pafuqishme për ti bërë ballë regjimit të Ramës.
Ajo tha se rezultati ishte një zhgënjim dhe se nuk ishin në nivelin e duhur. Sipas saj, mbetet e rëndësishme që të bëhet një riorganizim dhe një gjithëpërfshirje për të gjithë demokratët.
“Është humbje e madhe për opozitën shqiptare dhe për të gjithë shqiptarët sepse sot kemi një opozitë të pafuqishme për ti bërë ballë këtij regjimi të Ramës, por dhe për të gjithë shqiptarët. Mesa duket ne nuk kemi pasur, nuk kemi qenë në nivelin e duhur për të pasur besimin e shqiptarëve, kur nga ana tjetër kemi një regjim thuajse total që ka marrë në dorë të gjithë pushtetet. Kur ra Shkodra pothuajse pjesa tjetër nuk llogaritej. Historikisht që nga krijimi i saj deri sot demokratët kanë qenë pakicë në raport me ata që kanë bindje të majta.
Nqs ne pas këtij rezultati të thellë humbje nuk reflektojmë brenda nesh për bashkim, nevojitet një shkundje dhe një riorganizim i opozitës në tërësi dhe flas për PD në tërësi sepse mbetet forca kryesore opozitare dhe forca që do bëj rrotacionin atëherë çdo riorganizim i njëanshëm, çdo lëvizje tjetër që s’ka në fokus përbashkimin e PD dhe riorganizimin e saj mua më duket pa sukses. Sot në këto kushte shohim se nuk rezultoi e suksesshme, që sado të përfshijë një shumicë demokrate nuk është e mjaftueshme, ne na duhen të gjithë demokratët bashkë. Nqs PD e vulës nuk do jetë gjithëpërfshirëse nuk besoj se do jetë ndonjë sukses për të ardhmen dhe 2025“, tha Ilda Dhori.
