Ashtu siç ishte paralajmëruar të rinjtë e FRPD-së, së bashku me kandidatin e koalicionit “Bashkë Fitojmë” për bashkinë e Kamzës, i cili humbi zgjedhjet përballë Rakip Sulit, kanë protestuar paraditen e kësaj të enjte pranë ambienteve të KQZ.
Në këtë protestë ata kanë ripërsëritur qëndrimin e tyre për procesin zgjedhor të 14 Majit, duke nënvizuar se votimi elektronik në Kamëz është manipuluar dhe kanë kërkuar inpesktim të menjëhershëm të pajisjeve.
Teksa foli për mediat, Arjan Hoxha e quajti një masakër elektorale atë që ka ndodhur në Kamëz, duke thënë se rezultati ishte paracaktuar në sistemet kompjuterike.
Ai deklaroi se do të bëjë ankimim në KAS dhe Kolegjin Zgjedhor, si dhe do të kërkojë ngritjen e një grupi pune me ekspert të huaj që të vlerësojë sistemin pilot të votimit elektronik.
“Zgjedhjet e 14 majit ka qenë një masakër zgjedhore e parafabrikuar me anë të makinerive, ku nuk është lexuar vota e qytetarëve, por janë lexuar të dhënat kompjuterike të parapërgatitura në aparatet që kanë bërë identifikimin.
Sot është një deklaratë publike e iniciuar nga Forumi Rinor i Partisë Demokratike dhe desha t’i falënderoj për mbështetjen e dhënë gjatë gjithë fushatës elektorale.
Sot në Kamzë është një gjendje dramatike, një gjendje zhgënjyese dhe e padurueshme në aspektin social, pasi askush nuk e beson atë që ka ndodhur.
Nuk ka asnjë logjikë statistikore apo elektorale, një rezultat i paprecedentë, që nuk justifikohet dhe nga pritshmëritë as tonat, por as të kundërshtarit. Do të bëjmë ankesat tonë ën KAS dhe Kolegjin Zgjedhor, ku do të kërkojmë të ngrihet një grup me ekspert të huaj për këtë sistem pilot, por pa pilot”, tha Hoxha.
