Humbja në zgjedhjet lokale të së dielës ka sjellë reagime të ndryshme nga fronti i opozitës, por që të gjitha bashkon në një pikë, që është ringritja e Partisë Demokratike.
Edhe pse duket si një betejë e të gjithëve kundër të gjithëve, duket se disa prej atyre që garuan ose bënë fushatë për kandidatët e “Primareve” më 14 Maj, kanë disa ide për mënyrën si do të ndodh ky proces që PD të dalë e fortë përballë Ramës në zgjedhjet e 2025.
Për mjekun epidemiolog Ilir Alimehmeti, i cili do të jetë pjesë e këshillit bashkiak të Tiranës, bashkimi i PD-së së Vulës dhe grupit të Rithemelimit është kushti kyç për ringritjen, por nuk përjashtoi as hapjen e strukturave për njerëzit me mendim ndryshe.
Në vijim, ish-kandidati i “Primareve” për bashkinë e Tiranës shtoi se njerëzit duhet të përfshihen në vendimmarrje dhe se vota duhet të shkojë tek përfaqësuesi më i mirë.
“Së pari sa herë ndodh një situatë ajo fuqi vjen nga rrënjët dhe rrënjët janë njerëzit, në këtë rast janë demokratët. Ajo që ne kemi në dorë është vetja jonë, ta shohim dhe të nisim të punojmë. Baza ka nevojë të jetë e përfshirë në vendimmarrje. Kushti është që PD duhet të bashkohet dhe besoj se palët do dialogojnë se bashkimi bën fuqinë. Të paktën kemi opozitën dhe bashkimi është kushti kryesor sepse unë jam skllav i mekanizmave sepse po si pate ato nuk ka se si të presësh rezultate, dhe mekanizmi duhet të çohet te hapja, duhet të jemi të hapur ndaj njerëzve dhe mendimeve. Ne kemi nevojën për një front të gjerë për të shkuar si opozitë sepse problemi është se kur pozita merr fuqi kaq të mëdha do ta vuajnë të gjithë. Kur vjen puna për kërkim vote dhe kërkimi besimi s’mund të ngushtohet vetëm në një forcë politike. Unë personalisht kam hequr dorë nga sistemi komunist që është lideri, pra futet në një proces zgjedhor dhe unë hy te populli demokratik që kushdo që ka shumicën. Basha, Berisha, kushdo që të jetë po mori shumicën atë mbështet. Mbështes institucionin e votës së lirë”, theksoi Alimehmeti.
Alimehmeti u shpreh për MCN se nga këto zgjedhje duhet të vlerësojmë pikat e forta dhe të punohet për pikat e dobëta.
“Duhet kuptuar se këtu ka disa forca të ndryshme që kanë punuar në mënyra të ndryshme, ka pika të dobëta dhe të forta dhe te pikat e dobëta duhet punuar dhe te parimet që ne kemi si shtet për të shkuar drejt perëndimit. Një nga parimet që kemi si shtet demokratik është siguria e votës dhe janë njerëzit ata që shprehin mendimin e tyre, qoftë dhe perceptimin”, tha ai.
Alimehmeti nënvizoi gjithashtu se votimi i qytetarëve ishte më shumë emocional dhe se shumica e tyre nuk dinin programet e partive. Sipas Alimehmetit, Rama dekurajoi votuesit për të ulur pjesëmarrjen në votime që siç ai shprehet ka ndikim të drejtpërdrejtë te rezultati i opozitës.
“Ne kemi dhe njëlloj kontradikte që po ti pyesësh njerëzit 70% thonë që ne vendosëm sipas programit, por kjo nuk është e vërtetë sepse jam i bindur që votimi është emocional sepse nuk besoj se janë njohur me programet. Duam apo jo ka dy forca më madhore, ne niseshim si koalicion, në një garë të pabarabartë, të gjitha këto janë në sytë e të gjithëve dhe të ndërkombëtarëve. Ajo nuk ishte një garë e ndershme dhe e drejtë, kur shkojmë tek parimet në fund fare duhet ti dëgjojmë njerëzit dhe ata që folën me votë dhe ata që heshtën. Dimë se për herë të parë një vend demokratik një kryeministër del zyrtarisht dhe bën fushatë për zgjedhje vendore dhe doli të dekurajonte qytetarët se nuk ka problem nëse nuk merrni pjesë në votime kur ajo është guri themeltar dhe në këtë drejtim nuk pamë ndonjë reagim nga ndërkombëtarët”, u shpreh ai.
