Ujërat e trazuar në Partinë Demokratike pas rezultatit të zgjedhjeve lokale dhe thirrjet për ringritje e bashkim duke hapur partinë edhe për mendimin ndryshe, ishin pjesë e një pyetje konkrete që gazetarët i drejtuan sot Sali Berishës.
Në deklaratën për mediat nga selia blu, Berisha iu desh të përgjigjej pyetjes se si do të riformatohet partia dhe a ka vend për bashkim me PD-në e Vulës, siç Jorida Tabaku kërkoi sot para hyrjes në Kuvend.
Ish-kryeministri la të hapur mundësinë për negociata me palën tjetër, por i mbylli përfundimisht derën Lulzim Bashës dhe Enkelejd Alibeajt, duke thënë se nuk do të ketë kurrë një diskutim apo negociatë me ta.
“Qëndrimi dhe deklarata ime është kjo: dy persona janë të larguar në mënyrë përfundimtare nga PD, Lul Brava dhe Ali Basha, që mori vetëm sot shpërblim nga Rama 220 mijë euro. PD është e hapur për të gjithë të tjerët, debat, për negociata, për çfarë të dëshirojnë. Por, dy persona pengje të Ramës, u përdorën pa mëshirë nga ai për të goditur opozitën.
Përsa i përket atij rezultati iu bëj thirrje ti lexoni rezultatet me realizëm. PD iu mohua logo, PD iu mohua kryetari i koalicionit. E di si e bëri Edi Rama, kur ringu ishte përgatitur për ndeshje, me mekanizma alla Putin, shpalli veten fitimtar duke moslejuar kundërshtarin të hyjë në ring. Ç’fitore është ajo? Ajo është tmerr fitore. Pasojat ishin për PD, por më të këqija ishin për të. Ai parashikoi që ajo të ishte kolpo di grazia. Ti jepte një goditje asgjësuese, përfundimtare, por u përball me të kundërtën. Aktet e tij, kriminale. 510 mijë shqiptarë u ngritën mbi të gjitha, 200 mijë u përjashtuan nga listat u ngritën dhe i thanë që opozita është e pamposhtur. Këto zgjedhje janë farsë. Ne jemi zotuar se do të mbrojmë votën. Mediat po përpiqen të bëjnë fajtor viktimën dhe jo hajdutin. Ky është akt amoraliteti. Ata të dy janë larguar vetë nga partia”, tha Berisha.
