Gjykata e Apelit e ka vlerësuar si të ligjshëm dhe ka lënë në burg 2 të arrestuarit për kërcënimin e biznesmenit Eral Myftaraj dhe familjarëve të tij.
Gjykata ka caktuar masën “arrest me burg” për Algert Alcanin, dhe Edmir Boçin ndërsa për Shaqir Alcanin, gjykata ka vendosur “arrest në shtëpi.”
Personat e përmendur më sipër u arrestuan pasi pasi kanosën administratorin e një kompanie private në Cërrik, që të tërhiqej nga procedura e konkurrimit për tenderin që kishte fituar kjo kompani në bashkinë e Tiranës.
Shaqir Alcani, i biri i tij Algert Alcani dhe 37-vjeçari Edmir Boçi që u “kontraktua” prej tyre për të bërë presion edhe nëpërmjet kërcënimeve me jetë ndaj Myftarajt, që kompania e tij AL-MEXËOOD SH.P.K, të hiqte dorë nga një tender i bashkisë së Tiranës, u njohën sot me masën e sigurisë.
Prokurori Kreshnik Ajazi e cilësoi të ligjshme masën e arrestit të tyre dhe i kërkoi trupit gjykues të caktohet për ta masa “Arrest me burg”.
Sipas prokurorit, Shaqir dhe Algert Alcani, babë e bir, janë personat të cilët kishin pajtuar Boçin me nofkën “Çupja” dhe Louis Konomin (i shpallur në kërkim) për të kërcënuar biznesmenin Myftaraj që të tërhiqej nga tenderi me vlerë mbi 830 mijë euro, të Drejtorisë së Përgjithshme të Objekteve Publike në Bashkinë e Tiranës.
Në garë për tenderin me objekt “blerjen e lëndëve djegëse pellet për ngrohje dhe shpërndajen në objektet arsimore”, përveç kompanisë së Myftaraj që është shpallur fituese, kanë qenë edhe dy konkurrentë të tjerë.
Njëra prej dy kompanive rivale është ‘Alcani sh.p.k.’, me 100% të aksioneve të zotëruara prej 62-vjeçarit të arrestuar, Shaqir Alcani.
Personat, të cilët janë paguar nga babë e bir, Algert dhe Shaqir Alcani, janë persona me rekorde kriminale dhe me origjinë nga Lezha dhe Burreli.
Sipas hetimeve, të akuzuarit e kishin kërcënuar Eral Myftaraj me jetën e djalit për t’u tërhequr nga tenderi.
Në dëshminë e tij, biznesmeni rrefen se fillimisht ka qenë konkurrenti i tij, Shaqir Alcani dhe i biri, që i kanë kërkuar të tërhiqej nga tenderi. Me ta ai pohon se ka patur njohje shkak të biznesit në të njëjtën fushë.
“Kur aplikova në fillim kam folur dhe jam takuar me këta shtetas dhe më kanë thënë që të tërhiqesha nga ky tender sepse donin ta fitonin ata. Unë i thashë që nuk tërhiqesha dot por të vazhdonte procedura e rregullt dhe ligjore dhe nëse fituese do shpallej kompania e Shaqirit unë nuk do ankohesha dhe le ta fitonin ata”.
Me tej Myftaraj tregon se babë e bir kishin kontraktuar Edmir Bocin dhe Louis Konomi për ta kërcënuar me qëllim tërheqjen nga gara.
“Më datë 06.04.2023 më kontaktoi Edmir Boçi të cilin nuk e njihja. E kam takuar në një lokal në zonën e Medresesë në Tiranë dhe bashkë me të ishte dhe Louis Konomi. Këta persona më thanë të tërhiqesha nga prokurimi publik që unë kisha fituar, në të kundërt do kisha problem me ta. Të nesërmen në datë 07.04.2023 kam takuar sërish Edmir Boçi i cili më kërkoi sërish të tërhiqesha. Pasi nuk pranova më ka telefonuar Louis Konomi dhe më tha tekstualisht “Me këtë që bëre që nuk u tërhoqe nga tenderi unë do të të vras djalin”.
- Njoftimi i plotë nga Gjykata e Apelit:
Referuar raportimeve të mëparshme në media, Gjykata e Apelit të Juridiksionit të Përgjithshëm, informon sa më poshtë:
Nisur nga aktet e procedimit penal rezulton se, në Drejtorin Vendore të Policisë së Elbasanit ka depozituar kallëzim penal shtetasi me iniciale E.M, i cili ka parashtruar se disa shtetas të indentifikuar si shtetasit me iniciale Sh.A dhe A.A, kanë përdorur shtetasit me iniciale E.B dhe L.K (Ç) duke e kërcënuar me jetë atë dhe familjen e tij me qëllim tërheqjen nga një procedurë prokurimi publik që kallëzuesi deklaron se e ka fituar në Bashkinë Tiranë.
Gjykata e Rrethit Gjyqësor Elbasan, ka zhvilluar gjykimin lidhur me vlerësimin e ligjshëm të ndalimit dhe caktimin e masës së sigurimit “arrest ne burg”, ndaj personave nën hetim shtetasve me iniciale E.B, A.A dhe Sh.A, të dyshuar për kryerjen e veprës penale të “Shtrëngimit me anë të kanosjes ose dhunës për dhënien e pasurisë”, kryer në bashkëpunim, të parashikuar nga neni 109/b të Kodit Penal.
Gjykata e Rrethit Gjyqësor Elbasan me vendimin nr. 246 (13-2023-1453), datë 13.04.2023, ka vendosur:
1. Vlerësimin e ligjshëm të ndalimit të kryer nga policia gjyqësore, më date 10.04.2023, ora 10:15 ndaj të ndaluarit E.B, i dyshuar për kryerjen e veprës penale të “Shtrëngimit me anë të kanosjes ose dhunës për dhënien e pasurisë”, kryer në bashkëpunim, të parashikuar nga neni 109/b të Kodit Penal.
2. Caktimin ndaj personit nën hetim E.B si masë sigurimi atë të “arrest në burg” parashikuar nga neni 238 të K.Pr.Penale.
3. Vlerësimin e ligjshëm të ndalimit të kryer nga policia gjyqësore, më date 10.04.2023, ora 10:15 ndaj të ndaluarit A.A, i dyshuar për kryerjen e veprës penale të “Shtrëngimit me anë të kanosjes ose dhunës për dhënien e pasurisë”, kryer në bashkëpunim, të parashikuar nga neni 109/b të Kodit Penal.
4. Caktimin ndaj personit nën hetim A.A si masë sigurimi atë të “arrest në burg” parashikuar nga neni 238 të K.Pr.Penale.
5. Vlerësimin e ligjshëm të ndalimit të kryer nga policia gjyqësore, më date 10.04.2023, ora 10:15 ndaj të ndaluarit Sh.A, i dyshuar për kryerjen e veprës penale të “Shtrëngimit me anë të kanosjes ose dhunës për dhënien e pasurisë”, kryer në bashkëpunim, të parashikuar nga neni 109/b të Kodit Penal.
6. Caktimin ndaj personit nën hetim Sh.A si masë sigurimi atë të “arrest në shtëpi” parashikuar nga neni 237 të K.Pr.Penale.
7. Detyrohet personi nën hetim Sh.A të mos largohet nga banesa ku do të strehoet, që ndohet në…
8. Detyrohet personi nën hetim Sh.A të mos komunikojë me persona të tjerë me përjashtim të atyre që bashkëjetojnë me të në banesën ku ai do të strehohet për ekzekutimin e këtij vendimi.
Çështja në apel u shqyrtua mbi bazën e ankimeve:
– Nga personi nën hetim me iniciale E.B, i cili kërkoi ndryshimin e vendimit, vlerësimin si të paligjshëm të urdhërit të ndalimit dhe të mos vendosë asnjë masës të sigurimit personal, në alternativ caktimin e masë së sigurimit personal atë të “Detyrimit për t’u paraqitur në policinë gjyqësore”.
– Nga personi nën hetim me iniciale Sh.A, i cili kërkoi ndryshimin e vendimit të masës së sigurimit personal nga “arrest në shtëpi” në një masë sigurimit personal më të butë atë të “Detyrimit për t’u paraqitur në policinë gjyqësore”.
– Nga personi nën hetim me iniciale A.A, i cili kërkoi ndryshimin e vendimit të masës së sigurimit personal nga “arrest në burg” në një masë sigurimit personal më të butë atë të “Detyrimit për t’u paraqitur në policinë gjyqësore” ose atë të “Garancisë pasurore”.
Në përfundim të gjykimit, sot më datë 17.05.2023, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtare znj. Vojsava Osmanaj, vendosi:
– Miratimin e vendimit nr.246 (13-2023-1453), datë 13.04.2023 të Gjykatës së Rrethit Gjyqësor Elbasan.
