Në një dalje për mediat nga selia blu Sali Berisha ka refuzuar të pranojë rezultatin e zgjedhjeve lokale të 14 Majit, duke u shprehur se qytetarët u intimiduan nga grupet e bandave të stacionuar pranë qendrave të votimit dhe e shprehën vullnetin e tyre nën presion dhe shantazh konstat.
Procesi zgjedhor për Berishën ishte një farsë dhe këtë kryedemokrati e argumentoi duke iu referuar raportit paraprak të OSBE-ODIHR për shkeljet e hasura gjatë votimeve, të cilat lidheshin me blerjen e votës, presionin ndaj administratës dhe votimin në grup ose familjar.
“Farsa elektorale më e shëmtuar e Shqipërisë dhe Evropës, po kundërmon çdo ditë e më shumë. Unë vlerësoj me këtë rast raportin e OSBE-ODIHR, të cilët dëshmuan se zgjedhësit shqiptarë votuan nën presion dhe jo të lirë. Kjo është kryefjala e këtyre zgjedhjeve, ku Edi Rama ndryshoi në mënyrë antikushtetuese, antiligjore vullnetin e shqiptarëve, ndryshoi rezultatin e votimit. Raporti paraprak, ndonëse është jo përfundimtar vendos gishtin në problemet më madhore të këtyre zgjedhjeve, duke filluar nga makineria shtetërore elektorale si një përbindësh shkatërrimtar i procesit zgjedhor. Si një akt që krijon pabarazinë më të madhe në procesin zgjedhor, ndalet në të gjitha fortuat e ndërhyrjes në vullnetin e qytetarëve. Nënvizon blerjen masive të votës gjer dhe presionet e tjera të administratës mafioze, më e pranishme se kurrë në qendrat e votimit dhe në procesin e votimit.
Për të shkëputur ndonjë gjysmë fraze nga përfaqësuesit e nderuar të institucioneve më prestigjiozë të zgjedhjeve në Evropë, OSBE, Këshillit të Evropës, dhe Parlamentit Europian, dështuan siç e patë vetë. Ata refuzuan të nxirrnin nga goja çdo cilësor që u kërkua nga mediat e Edi Ramës për ta tundur si flamur të këtyre zgjedhjeve, më të manipuluara dhe rrënuara në historinë e Shqipërisë. Në këtë kontekst, populli opozitar pa në dritën e diellit përpjekjen e narko-shtetit për të asgjësuar opozitën e vërtetë si pjesëmarrëse në zgjedhje. Ajo jo vetëm i konfiskoi vulën, jo vetëm e privoi nga të gjitha fondet që i takonin në ligj dhe kushtetutë, por kaloi në aktin e mohimit të drejtës së koalicionit për të zgjedhur kryetarin e vet dhe i tmerruar nga emri i Sali Berishës, nuk lejoj regjistrimin e tij në listë”, -tha Berisha.
Ish-kryeministri komentoi për herë të parë edhe rezultatin e zgjedhjeve në Shkodër, ku kandidati i koalicionit “Bashkë Fitojmë” Bardh Spahia humbi përballë rivalit të tij socialist Benet Beci, çka shënoi edhe rënien e një bastioni të djathtë pas 32 vitesh.
Berisha tha se procesi zgjedhor në Shkodër është manipuluar me blerje masive të votave pasi janë hedhur dhjetëra milionë euro. Ai gjithashtu theksoi se qytetarët votuan nën rrethimin e bandave të lidhura me qeverinë dhe panë sesi trinomi i shëmtuar Rama-Doshi-Brava mposhti vullnetin e lirë të shqiptarëve.
“Shkodra votoi nën pushtim të vërtetë. Të gjitha pollet e kundërshtarëve tani, por dhe tonat e nxirrnin Bardh Spahinë 14 ose 16 pikë përpara. Nëse t’i mendon se Sali Berisha tërhiqet përpara krimit, ai sheh veshin e tij pa pasqyrë. Kurrë, unë nuk tërhiqem përpara bandave të krimit shtetëror dhe jo shtetëror. Shkodra është shembulli më i shëmtuar ku u votua nënë rrethim nga bandit e Edi Ramës. Në Shkodër u përdorën dhjetëra milionë euro. Trinomi Rama-Doshi-Brava ishte shëmtia më e madhe me veprimet e tyre në këtë proces zgjedhor. Jam I bindur se qytetarët e Shkodrës nuk do ta pranojnë pushtetin e krimi”, tha Berisha.
Pyetjes së gazetarëve nëse do të japë dorëheqjen, Berisha zgjodhi t’i përgjigjej duke thënsë se kurrë “ai nuk dorëzohet përpara krimit”.
