Në një skanim që i bëri procesit zgjedhor të së dielës dhe rezultatit në bashkinë e Shkodrës, analisti Fatos Lubonja konstatoi se bashkitë janë fituar nga ai që ka hedhur më shumë para.
Duke u ndalur veçanërisht te rezultati i paprecedentë i PS në Shkodër, ku Benet Beci doli fitues përballë Bardh Spahisë, analisti tha se kalimi në shifra të tilla në një bashki që ka qenë djepi i demokracisë, është rezultat i pabesueshëm.
“Shkodra, Kamza me këtë kalim 60% është e pabesueshme. Unë gjykoj që ky pushtet, atje ku do të fitojë, fiton. Si ka mundësi, Shkodra antikomuniste, shkon edhe voton. Është e tmerrshme”, tha Lubonja.
Por, ish-deputeti socialist Ervin Bushati ndezi debatin në studion e “Open”, duke iu përgjigjur konstatimit të Lubonjës, teksa tha: “Ose është i mrekullueshëm”.
Pas këtij reagimi, Lubonja se në Shkodër ishte vetëm leku që ka vendosur dhe influenca e krimit.
“Aktivizimi i krimit, të gjitha këto kanë akumuluar vota. Në fund fare fiton kush ka nxjerrë më shumë para. Këtu është vetëm leku që vendos. Leku shkon gjithnjë e më shumë në duart e kësaj partie. Unë dua të shtoj se ka edhe disa arsye, që janë edhe përçarja, edhe propaganda me non-grata, por edhe deklarata që nuk do të keni asgjë nëse nuk fiton PS. Pra nuk është se garojnë dy parti me një shtet neutral që rregullon vetëm anën teknike, apo ligjin, por kemi shtetin që punon për një parti të vetme. Dhe kjo nuk mund të shpjegohet ndryshe”, u shpreh analisti i njohur.
Më tej, në analizën e tij Lubonja iu drejtua Bushatit duke i thënë: “Keni arritur njësoj si shoku Enver”.
