Autoritetet në Mal të Zi u vendosën ditën e sotme në alarm, pasi një person, fillimisht i panjohur kërcënoi se do të hidhte në erë aeroportet në Podgoricë e Tivat, por edhe disa hotele në Sutomore si dhe disa stacione hekurudhore.
“Zyrtarët e Qendrës Rajonale të Sigurisë “Jug”, Departamenti i Sigurisë së Barit, janë njoftuar mëngjesin e sotëm nga punonjësit e një hoteli në Sutomore se kanë marrë një telefonatë nga një person i panjohur, i cili ka njoftuar se do të “hedhë në erë” hotelet dhe stacionet hekurudhore, pa specifikuar se cilat”, njoftoi fillimisht policia malazeze.
Në një reagim të mëvonshëm mbi këto kërcënime, drejtoria e policisë së Malit të Zi zbuloi se ato kishin ardhur nga një 45-vjeçar serb, nga Beogradi.
Policia ka konstatuar se telefonatat e bëra në orët e para të mëngjesit, në numrat e telefonit të Aeroportit të Podgoricës dhe Tivatit kishin ardhur nga e njëjta adresë dhe nga i njëjti numër telefoni.
Në njoftimin që pasoi, thuhej: “Masat dhe veprimet janë ndërmarrë nga zyrtarët policorë të Policisë së Tivarit, të cilët në bashkëpunim me oficerët e NCB Interpol Podgoricës kanë kuptuar se përdorues i numrit të telefonit nga i cili është dërguar telefonata kërcënuese është P.M.(45) nga Beogradi”.
