Nga Boldnews.al
Në kulmin e konfliktit të përçarjes së PD-së, më 8 janar 2022, Roland Bejko zgjodhi të ndodhej në momentin dhe kohën e gabuar, teksa u përplas verbalisht dhe paksa fizikisht me mbështetës të PD-së, pjesë e grupit të Rithemelimit të përfaqësuar nga Sali Berisha. Tashmë Bejko zgjodhi të jetë kandidat i PD-së zyrtare, e dalë nga rryma e vogël e drejtuar nga Enkelejd Alibeaj, që ka vulën dhe logon e rëndë të PD-së, por nuk ka elektorat. Votimi për Roland Bejkon thelloi ndarjen mes dy rrymave brenda grupit “Alibeaj” pasi tre deputetët Gazment Bardhi, Jorida Tabaku dhe Dhurata Çupi në shenjë proteste refuzuan të marrin pjesë në votim.
Bejko sakaq e ka nisur fushatën e tij për bashkinë e kryeqytetit duke sulmuar drejtpërdrejtë kandidatin e dalë nga “Primaret” në PD, Belind Këlliçi, i cili do të kërkojë votën në emër të koalicionit “Bashkë Fitojmë”.
Kandidati i Partisë Demokratike për Bashkinë e Tiranës, Roland Bejko, ka komentuar premtimet e kandidatit të çiftit Meta-Berisha, Belind Këlliçi, duke u fokusuar tek ajo për transport publik falas.
Në një intervistë në televizion, pak orë pasi u zgjodh si kandidat Bejko tha se Këlliçi është në hall dhe po bën premtime jorealiste, të cilat nuk i beson as ai vetë, por nuk komentoi aspak fushatën e kryebashkiakut aktual, Erjon Veliaj.
“Ndonjëherë është mirë që krizës apo mungesës së besimit të qytetarëve, të mos i hidhet një lloj shurupi i tillë përsipër, për t’i ëmbëlsuar ata, dhe për t’u bërë i pëlqyeshëm. Jo çdo premtim populist është i realizueshëm sepse nesër do të ballafaqohet me qytetarët. Kemi dëgjuar premtime të tilla të bujshme në Shqipëri. Kush është në hall bën premtime që edhe vetë nuk i beson dot. Nëse i beson nuk është në këtë realitet, jeton në një botë tjetër”, tha kandidati i PD-së.
Pas përplasjeve të brendshme në Partinë Demokratike dhe rezultatit të zgjedhjeve të 6 Marsit 2022, Bejko u rreshtua hapur kundër Lulzim Bashës, duke i kërkuar publikisht dorëheqjen, por edhe kundër Sali Berishës, për të cilin shprehet se ka kundër amerikanët. Bejko shprehej në media se ai ia kishte kërkuar dorëheqjen Bashës, por se Berisha e mundi me propagandë duke u rikthyer si kryetar i PD. Në këtë pikë Bejko ka një problem thelbësor pasi ka ngatërruar kundërshtarin e vërtetë politik. Në qëndrimet e deritanishme ai ka sulmuar ashpër Berishën dhe kandidatin e koalicionit “Bashkë Fitojmë” Belind Këlliçi, duke lënë si të “dorës së dytë” problemin e vërtetë qa ka Tirana me kryetarin aktual Erion Veliaj, i provuar për tetë vite radhazi.
I ndodhur në këto kushte Bejko po tenton të marrë “flamurin e proamerikanizmit” për ta shëtitur nëpër kryeqytet si trofeun që mendon se do i sjellë vota. Kandidimi i Bejkos si njeri i amerikanëve, ngjan me desantimin e aleatëve të Xhevdet Mustafës në Shqipërinë komuniste të Enver Hoxhës. Problemi që ka Bejko në këto kushte është fakti që a sjell vota në kuti të qënit proamerikan?! 6 Marsi i vitit 2022 tregoi që sulmet e ambasadores amerikane ndaj kandidatëve të Berishës sollën mbështetje për Ramën dhe fshirjen nga domeini politik i grupimin Basha-Alibeaj. Pra ky qëndrim i Bejkos mund të favorizoj më shumë Erion Veliajn sesa vetë atë. Ndërkaq dihet mbështetja e hapur që ambasadorja amerikane ka mbajtur këto vite ndaj Veliajt.
Po ashtu një deklaratë e mëparshme sapo u zgjodh kandidat për Bashkinë e Tiranës se nëse humbet fajet i ka Berisha duket se nuk është “lajthitje” apo lapsus momenti, por diçka e mirëmenduar. E Gjithë fushata e Bejkos po shkon në sulm kundër të “tijëve” që dikur ndau të njëjtat ideale politike, e madje edhe vizion për mënyrën e qeverisjes.
Avantazhet
1-Edhe pse një figurë politike e vjetër në strukturat e PD-së, Roland Bejko nuk ka mbajtur poste ministrore, duke mos mbartuar edhe barrën e asaj çfarë mund të ketë shkuar keq në qeverisjen e djathtë.
2-Roland Bejko gjithsesi ishte nga të parët që pasi mbështeti fuqishëm ish-kryetarin Lulzim Basha kërkoi menjëherë dorëheqjen e tij.
3-Ndonëse vetë Bejko në çdo dalje sulmon më shumë Berishën dhe Këlliçin sesa Ramën dhe Veliajn, sërish PD-ja reale ka vendosur të mos e anatemojë, kjo mund të jetë në favorin e Bejkos, por jo për meritë të tij.
4-Ka luksin që t’i kërkojë Alibeajt që nga thesi i madh i fondeve që kanë marrë nga KQZ, të sigurojë edhe ai një “trastë” për të zhvilluar fushatën në Tiranë. Pra paratë për organizme dhe takime nuk i mungojnë.
5- Erion Veliaj jo vetëm nuk e sulmon, por e ka “aleatin e heshtur” më të madh, duke nxitur përçarjen brenda së djathtës me shpresën se edhe me ndihmën e tij Bejko do të rrëmbejë disa vota që potencialisht janë për Belind Këlliçin. Në këtë mënyrë, edhe pa “marrëveshje verbale” Bejko do të ketë mbështetjen indirekte të Veliajt dhe në hesapin fundor të votave kjo mund ta ndihmojë që të mos dalë i fundit në renditje.
Disavantazhet
1-Roland Bejko është kandidati i PD-së së vulës që ndonëse ka paratë e buxhetit të shtetit për fushatë dhe mbajnë vulën dhe logon e rëndë të PD-së, përfaqëson një grupim që deri më tani ka treguar që përroin e vogël të saj po ia bashkëngjit “Lumit të rrëmbyeshëm të Rilindjes”.
2-Ka një numër të vogël mbështetësish publik që vijnë nga radhët e PD-së historike. Në çdo takim që ka kryer e ka pasur të pamundur që të krijoj masivitet qoftë edhe duke u krahasuar me partinë Çame të Idrizit..
3-Mban koston se është futur në një garë jo për të fituar, por për të dëmtuar kandidatin e koalicionit “Bashkë Fitojmë”, Belind Këlliçi. Edhe në artikulimet e tij të guximshme dhe optimiste nuk e përmend asnjëherë fitoren e bashkisë së Tiranës.
4-Deri më tani në daljet publike ka tentuar të anashkalojë dyshen Rama-Veliaj si problem për keqqeverisjen e vendit dhe të bashkisë së kryeqytetit dhe këto detaje shihen mirë nga votuesit dhe kjo mund të jetë një arsye më shumë që votuesit e djathtë të mos e konsiderojnë shumë kandidaturën e Bejkos. Por edhe elektorati gri vështirë t’i bashkohet dikujt që ka hyrë “të flejë me mullixhiun për inat të vjehrrës”.
5-Ndonëse kandidon për bashkinë e kryeqytetit, nuk ka qenë pjesë e strukturave politike të PD-së së Tiranës. Kjo do të thotë që ka pak mbështetje dhe brenda grupimit të vulës duke marë parasysh faktin që Jorida Tabaku, Gaz Bardhi dhe deputet të tjerë nuk e mbështetën kandidimin e Bejkos në Tiranë.
LEXO EDHE:
https://boldnews.al/2023/04/22/belind-kellici-mes-sakrifices-dhe-ambicies/
https://boldnews.al/2023/04/21/erion-veliaj-dhe-14-maji-si-beteja-e-tij-finale/
https://boldnews.al/2023/04/20/arlind-qori-idealisti-i-majte-kandidati-antisistem/
