Një punonjës i IKMT-së, i identifikuar si Elton Lleshi dhe dy kolege të tij janë kapur në flagrancë nga simpatizantët e opozitës, teksa shpërndanin para në këmbim të votave brenda një pallati, në qytetin e Peshkopisë.
Ishte kandidati i koalicionit “Bashkë Fitojmë”, Ismail Uka, ai që njoftoi mediat për incidentin në Diër, ndërkohë që policisë i janë dashur dy orë për të kryer arrestimin e tre punonjësve, që janë pjesë e stafit të zv/kryeministres Belinda Balluku.
Nga raportimet prej terrenit mësohet se Lleshi dhe dy punonjëset e tjera janë mbajtur të bllokuar brenda pallatit nga ana e përfaqësuesve të opozitës, të cilët i kapën me “presh në duar”.
Ndërkohë, është publikuar edhe video nga momenti i arrestimit të tyre, teksa në dalje të pallatit tentojnë të mbulojnë me kapuç fytyrën, për të mos u fiksuar nga kamerat e televizioneve që ndodhen në vendngjarje.
