Arrrestimi i Fredi Belerit pak pas mesnatës së të enjtes në Himarë, është komentuar nga kryetari i Partisë së Lirisë, Ilir Meta në studion e “Opinion”.
Teksa kandidati i koalicionit “Bashkë Fitojmë” ndodhet pas hekurave kur na ndajnë 48 orë nga verdikti i qytetarëve, Meta tha se Beleri do të hyjë në histori si i vetmi kandidat që e mundi Edi Ramën nga burgu.
“Nuk ka ndodhur ndonjëherë që të arrestohet një kandidat dy ditë para zgjedhje. Para 10 ditësh Edi Rama ishte në Himarë, hungërinte dhe gjoja imitonte këtë kandidatin tonë sepse nuk i ishte përgjigjur komuniteti. Pak ditë më pas u krijua një zhurmë e madhe mediatike, ishte gjithçka e sponsorizuar nga Edi Rama.
Ky ka vetëm një qëllim grabitjen e pronave të qytetarëve. Në Sarandë ai nuk ekziston. Del i treti. Kandidati i pavarur do të dalë i dyti se është i socialistëve ai dhe kandidati i rilindjes do të dalë i treti. Mafia e grabitjes së tokave kërkojnë ta kenë nën zotërimin e tyre, dhe një kryetar bashkie me integritet do të mbronte qytetarët dhe pronat e tyre.
Zoti Rama ka bërë një autogol shumë të rëndë, pasi u nis për të bllokuar zotin Beleri fizikisht. Zoti Beleri do të hyjë në histori si një kandidat që e mundi Edi Ramën nga burgu.”
