Kryeministri Edi Rama ka reaguar në lidhje me arrestimin e kandidatit të opozitës për Himarën, Fredi Beleri.
Në një reagim në Twitter, ndryshe nga më herët që ka sulmuar ashpër Bejlerin, Rama përdor një gjuhë më të moderuar.
Ai thotë se arrestimi i Bejlerit s’ka lidhje me betejën politike.
“Ndalimi i kandidatit të opozitës për Himarën F.Beleri me urdhër të prokurorisë përbën një sprovë të madhe për drejtësinë në vigjilje të zgjedhjeve, që do të thotë se shkelja e ligjit nga ana e tij duhet të jetë e provuar dhe ndalimi i tij ligjërisht i motivuar!
Beteja jonë me atë kandidat nuk ka asnjë lidhje me hetimet apo përfundimet e prokurorisë, prandaj duke respektuar pavarësinë e plotë të organeve të drejtësisë, i bëj thirrje të gjithëve të mos nxitohen me konkluzione politike po të presin me durim fjalën dhe provat drejtësisë”, shkruan Rama në Twitter.
