Listimi i të gjitha fyerjeve që ai ka përsëritur në takimet e tij elektorale për fushatën e zgjehdjeve të 14 Maj, ka bërë që Edi Rama të shpërthejë në kërcënimin live në “Opinion” të dy personave, që sipas tij mbështesin Fredi Belerin në Himarë.
“Kokërr injoranti, budalla, fyell, Koçi i Teto Ollgës”, janë disa nga fyerjet që Ramës iu kujtuan nga gazetarja Fatjona Mejdini, e që bën që Rama t’i përvishej sërish Belerit.
“Mos e merr për të mirëqenë që jam nervoz. Unë i qëndroj të gjitha atyre që kam thënë dhe i kam thënë për një kandidat preçiz. Analfabet, dru. Këto i kam thënë dhe kam thënë më shumë, kam thënë maskara për kandidatin që është kandidati i faqes së zezë në Himarë”, tha Rama.
Rama e cilësoi Belerin një maskara që ka angazhuar njerëz për të kërcënuar emigrantët shqiptarë në Greqi që të votojnë për të më 14 maj.
Ai foli me emra duke kërcënuar Napolon Çakallin dhe Spiro Kokan, se do të merret personalisht me ta pasi sipas tij janë personat që kërcënojnë emigrantët se do iu grisin letrat greke.
“Ky maskara ka angazhuar njerëz për të kërcënuar emigrantët. Unë dua ta shfrytëzojë këtë emision për t’iu drejtuar dy personave me emër. Një Napolon Çakalli, i cili e di shumë mirë se kush është dhe një Spiro Koka, një tjetër personazh. Iu them që mos guxoni të merrni në telefon emigrantët që duan të votojnë ose që mund të vinë të votojnë, as për t’iu thënë që do vini të votoni patjetër për këtë injorantin këtu apo duke i thënë që po votuar për Goron e PS do iu grisim letrat greke dhe unë po iu them në sy do të merrem personalisht me ju të dy dhe jeni ju që rrezikoni që t’i humbisni letrat greke. Avokati më i madh i emigrantëve në Greqi dhe i minoritetit grek në Shqipëri jam unë dhe qeveria ime, është ky shtet”, u shpreh Rama.
