Pritjet e gjatë në stacione, mungesa e ajrit të kondicionuar si në verë dhe në dimër, apo nuk janë sfidat e vetme që duhet të kalojnë përdoruesit e transportit publik në Tiranë.
Një ndër sfidat kryesore është që autobusi të arrijë në destinacion, pasi të shumta janë rastet kur mjeti merr flakë apo pëson defekt në mes të rrugë.
Diçka e tillë ka ndodhur sot me një prej atobusëve të kompanisë problematike, “Green Line”, e cila kryen transportin e udhëtarëve në linjën e Unazës.
Autobusi elektrik ka pësuar defekt teksa ndodhej në kryqëzimin e rrugës së Elbasanit, duke shkaktuar një trafik të rënduar në këtë zonë dhe stres të shtuar të qytetarët që udhëtonin me të.
Në foton e siguruar nga Boldneës, shihet se mjeti është fikur në mes të rrugës, ndërsa të gjithë qytetarët që udhëtonin kanë zbritur.
Ky nuk është rasti i parë kur autobusët e kompanisë “Green Line” me pronar Nadir Çaushollin, i njohur si miku i kryebashkiakut Erion Veliaj, pësojnë defekte ose shaktojnë aksidente në rrugët e Tiranës.
Incidenti më i rëndë ishte ai i ndodhur më 27 shkurt në zonën e Shallvareve, ku autobusi i linjës së Unazës mori përpara 10 automjete dhe nga aksidenti mbetën të plagosur 9 persona.
Ndërkohë, një tjetër rast kur jeta e qytetarëve që përdorin transportin publik në Tiranë u vendos në rrezik serioz është aksidenti i 29 prillit të vitit të shkuar.
Ai lidhet po me autobusin elektrik të promovuar nga Veliaj dhe Çausholli, i cili përplasi një mjet e më pas përfundoi mbi lumen Lana, përballë Gjykatës së Tiranës.
Në shumicën e rasteve, faji u është lënë shoferëve të kompanisë por e vërteta qëndron diku tjetër, pasi përveç orëve të stërgjatura të punës me të cilat punojnë shoferët, ekspertët rendisin mungesën e kontrolleve teknike dhe riparimeve të shpeshta për autbusët si faktorë kryesorë për aksidentet.
