Votën për Pashkë Gjonin në emër të ndryshimit, ishte ajo çka Ilir Meta u kërkoi qytetarëve të Lezhës në takimin përmbyllës elektoral që u zhvillua sot.
Kreu i PL kërkoi që lezhianët të dielën t’i japin ndëshkimin e merituar Partisë Socialiste, të cilën e quan sekt arrogant.
“Emri i tij bashkoi jo vetëm gjithë demokratët por edhe socialistët që janë të zhgënjyer nga ky sekt arrogant. Votoni për doktor Pashk Gjonin që t’i shërojmë plagët e Lezhës, që t’i bashkojmë të gjithë lezhianët. Kam një lutje për të gjithë, kur takojmë vëllezërit tanë që kanë lënë punët e tyre dhe kanë ardhur nga jashtë, por ne që jemi këtu, çfarë mund të presim për të thënë fjalën e tyre”, tha ai.
Duke ju referuar thirrjeve të Ramës drejtuar demokratëve për të mos votuar, Meta i konsideroi absurde.
“Si mundet një kryeministër, një delinkuent të thotë mos votoni? Kjo është një arsye më shumë për të mos votuar. Ndaj jam edhe një herë tjetër këtu për të thënë se Lezha do t’u tregojë vendin e merituar besëprerëve”, u shpreh Meta.
