Komiteti Shqiptar i Helsinkit (KShH) ka dalë me një njoftim zyrtar lidhur me rastin e 27-vjeçarit Jani Rustemaj i cili përfundoi në koma pas arrestimit nga policia e Tiranës për vjedhjen e një tapeti.
KShH, njofton se ka ndërmarrë një mision monitorimi mbi ngjarjen dhe ka konstatuar se janë shkelur një sërë ligjesh e si dhe janë përdorur standarde të dyfishta për Rustemajn, duke mos e pranuar në burgun 313 por duke e mbajtur për 5 ditë në dhomat e policisë.
Njoftimi:
Komiteti Shqiptar i Helsinkit (KShH) ndërmori një mision monitorimi pas disa sinjalizimeve në media se shtetasi me inicialet J.R, i minoritetit Rom, i arrestuar më datë 12.04.2023, për veprën penale të vjedhjes, ndodhet i shtruar pranë Qendrës Spitalore Universitare “Nënë Tereza” (QSUNT) në gjendje të rëndë.
Gjatë monitorimit të tyre në institucionet përkatëse, si Blloku i Sigurisë i Drejtorisë Vendore të Policisë Tiranë dhe gjithashtu pranë kësaj Drejtorie, Institucionet e Ekzekutimit të Vendimeve Penale (IEVP) 302 dhe 313 (Mine Peza dhe Jordan Misja), gjithashtu edhe takimi me avokatin e caktuar nga familjarët e të arrestuarit.
Gjatë këtij monitorimi, KShH ka konstatuar se janë shkelur një sërë ligjesh nga këto institucione si dhe janë përdorur standarde të dyfishta për shtetasin me iniciale J.R. duke mos e pranuar në burgun 313 por duke e mbajtur për 5 ditë në dhomat e policisë.
Lidhur me ngjarjen:
Më 17 prill ora 04.00 e mëngjesit Jani Rustemaj ka shkuar në spital gjendje të rëndë shëndetësore, në kushtet e insuficensës respiratore. E ka dërguar urgjenca kombëtare shoqëruar nga forcat e policisë.
Menjëherë është futur në reanimacion, parametrat jetësor të përkeqësuar e kanë cuar të riun në koma.
Dyshohet se 27 vjeçari ka qenë përdorues i varur heroine dhe sipas kartelës mjekësore të tij, pas qëndrimit në bllokun e sigurisë pa konsumuar lëndën narkotike ai ka shfaqur shqetësime dhe me qëllim qetësimin është përdorur metadom. Nga kjo, ai ka shfaqur shqetësime gjë e cila ka sjellë edhe situatën aktuale në të cilën ndodhet.
Ndërkohë ende është e pa qartë prognoza neurologjike.
