Nga Durrësi, ku përmbylli sot fushatën për bashkitë e këtij qarku, kryedemokrati Sali Berisha pati një thirrje të pastër për banorët e qytetit bregdetar, duke kërkuar votën për “birin e tyre”, Igli Cara, në mënyrë që të shporret mafia Rama-Dako-Sako.
“Ky miting ky entuziazëm, i njerëzve të lirë, për Durrësin dhe Shqipërinë, dëshmon se Durrësi ka vendosur ndryshimin dhe se më 14 maj do të votojë, njërin nga bijtë e vet më të shquar. Njërin nga qytetarët më shembullor, një nga politikanët që do më shumë qytetarët e këtij qyteti. Programi i Igli Carës është për të ardhmen e Durrësit, pas takimeve intensive me banorë të qytetit, Igli Cara, vjen para jush me një program që do të shërojë plagët e merituara në këto 23 vite, nga kjo mafie më e pashpirt të Shqipërisë, Ballkanit dhe të Europës. Durrësi, qyteti i lavdisë historike, qyteti port i kombit drejt Perëndimit, ka nevojë jetike ndryshimin. Durrësi ka nevojë jetike shpëtimin nga kthetrat e një mafie që është e pashpirt ndaj qytetarëve të Durrësit. 14 maji do të jetë fundi i saj. Mafia Rama –Dako-Sako u vërsul pa mëshirë mbi monumentet. Durrësi që me porton e vet begatonte qytetin dhe vendin, po pëson pushtimin më të egër”, tha Berisha në qytetin bregdetar.
Duke u ndalur më pas te afera e portit të Durrësit, ai u shpreh se në 2700 vite askush nuk e preku atë, por Edi Rama me ëndrrat e tij për t’u bërë si Alabari po e plaçkit në ditën për diell mbi 800 mijë metër katrorë tokë.
“Në 2700 vite asnjë pushtues nuk ia preku Portin Durrësit, nuk ia preku rrugën e frymëmarrjes. Edi Rama për të realizuar ëndrrën e tij arabe prej miliarderi do ta na e shndërrojë Durrësin në Dubai. Unë nuk jam racist, kam respekt për kombet dhe qytetërimin, por ata që krijuan doktrinën tonë kombëtare, shkruajtën se për ne dielli lind nga Perëndimi. Ndaj dhe Durrësi do të mbetet gjithmonë syri i Perëndimit për kombin shqiptar. Edi Rama me një babëzi të papërmbajtur, ka vendosur të realizojë ëndrrën e tij të bëhet miliarder si Alabbari duke plaçkitur tokë të shqiptarëve”, deklaroi Berisha.
Lideri i opozitës gjithashtu konstatoi se kandidatët e opozitës në këtë qark po përballen me bandat që mbështesin qeverinë dhe kërkojnë të mbajnë në pushtet mafian që uzurpoi Durrësin.
Ndaj sipas tij më 14 maj, vota duhet të jetë për të gjithë kandidatët e dalë nga procesi i “Primareve” që përfaqësojnë vullnetin e lirë të qytetarëve.
“Miqtë e mi më 14 maj përballe idealistët e Durrësit të Shqipërisë që besojnë se liritë dhe të drejtat e njeriut dhe që besojnë se pushteti në një dorë është tragjedi kombëtare. Kandidatët e mazhorancë, takohen me grupe mafioze shpërndajnë para. Edi Rama ka vjedhë shqiptarët më shumë se të gjithë pushtuesit, ka vendosur mbi shqiptarët tiraninë e varfërisë. Edi Rama kalon nga sheshi në shesh me fjalor halabaku, duke treguar përçmimin e tij për vlerat qytetarë, për familjet, për idealet për çdo gjë tjetër. Edi Rama mendon se me këtë fjalor do të mund të mbulojë vjedhjet e mëdha, lidhje të tij të drogës, aferën McGonigal. Kam një thirrje për çdo durrsak pavarësisht nga bindjet partiake, çfarë pësuan qytetarët e Durrësit në këto vite? Vetëm betonizim, mafia zoti i Durrësit qytetar që ka ndjenjat, kaq i rëndësishëm për fatin e kombit, votoni Igli Carën në Durrës, Rezart Tushën në Shijak. Qytetarë, mos harroni se kryeministri është i tmerruar nga vota juaj. Rroftë Durrësi”, tha ndër të tjera ish-kryeministri Berisha.
