Kandidati i opozitës për Bashkinë e Tiranës, Belind Këlliçi, ka vijuar turin e takimeve me qytetarët e Tiranës teksa sot është ndalur në Sauk dhe zonën e Liqenit të Thatë.
Nga Sauku, Këlliçi denoncoi Bashkinë e Tiranës se po dërgon gjobvënësit e Policisë Bashkiake dhe Tatimet, te bizneset të cilët dalin hapur në mbështetje të ndryshimit.
“Më ka ndodhur një praktikë në pjesën dërrmuese të rasteve kur kam hyrë ne biznese, ku kanë ardhur kamerat, ditën e nesërme jam kontaktuar nga drejtuesit e PD në ato njësi, në ato zona, dhe më kanë thënë se të nesërmen ka vajtur Policia Bashkiake për të gjobitur ato biznese dhe tatimorët e bashkisë kanë shkuar për t`i gjobitur. Kështu që duke qenë se ka një seri masash represive ndaj biznesit edhe ndaj qytetarëve që dalin dhe mbështesin hapur publikisht ndryshimin, që më mbështesin mua, kam vendosur që të mos i vendos në pozitë të vështirë, mos t`i pengoj në punën e tyre dhe sigurisht preferoj përherë t`i takoj pa kamera”-tha Këlliçi.
Ndërsa në zonën e Liqenit të Thatë, Këlliçi denoncoi përsëri kreun e IMT, Mariglen Qato. Gjatë takimeve me qytetarët, Këlliçi u njoftua se tenderi për punimet për rehabilitimin e Liqenit të Thatë, ishin fituar nga kompania “5D Konstruksion”, e të afërmëve të Mariglen Qatos. Sipas qytetarëve që citoi Këlliçi, punimet nisën tre vjet më parë dhe kishin afat për të përfunduar 6 muaj, por ende sot pas tre vjetësh, ato nuk janë mbyllur.
I bëjmë thirrje Mariglen Qatos, t`u thotë atyre të “5D-s”, që janë bërë tre vjet. E ka pasur 6 muaj kur ka vjedhur lekët, janë bërë tre vjet. Prandaj nuk vejnë datë dhe rrejnë, se thonë e kemi vënë tani. Jemi i vetmi kryeqytet në botë, që për tre vjet kemi ndryshuar tre herë planin rregullues. Një plan që normalisht nuk ndërron në 20 vjet. Pra kur bëhet një herë nuk ndërron në 20 vjet. Ne e kemi ndërruar tre herë në tre vite. Llogariteni vetë arsyen”-tha Këlliçi.
