Betonizimi i Tiranës dhe miliona metër katrorë leje ndërtimi që Erion Veliaj ka dhënë në 8 vite si kryebashkiak, kanë qenë temë diskutimi në “Çim Peka Live” dhe kreu i PL, Ilir Meta ka bërë një denoncim të fortë lidhur me çështjen.
Meta tha se po tentohet spostimi i “Varrezave të Dëshmorëve të Kombit”, për të ndërtuar kompleks me pallate dhe rezidenca.
Ai gjithashtu zbuloi se kur drejtonte Presidencën, një sekser i bashkisë së Tiranës dhe qeverisë tentoi t’i tregonte planin e shumpërfolur për kthimin e Pallatit të Brigadave në kulla.
“Po të lihen këta, jo vetëm Pallatin e Brigadave do ta kafshojnë, kishin një plan, më dërgonin një sekser që po doli ky plani ti ke ndonjuë problem për Pallatin e Brigadave? Sikur ta hapim kështu, ta shikojmë…Këtë punë bëjnë këta. Po ta dinë edhe veteranët që këta i kanë vënë syrin edhe Varrezave të Dëshmorëve për t’i spostuar për të ndërtuar një kompleks. Këta nuk ndalen në babëzinë dhe papërgjegjshmërinë e tyre. Edhe këtë plan e kanë. Duhet të ndalojmë shkatërrimin e Tiranës, të Durrësit, të Beratit. Në qendër të Beratit një beton i tmerrshëm“, u shpreh Meta.
Më tej, ai tha se projekti i kandidatit të “Bashkë Fitojmë”, Belind Këlliçi për Tiranën është i duhuri dhe do të ndalë betonizimin e hapësirave publike të kryeqytetit, ndërsa transporti publik falas do t’i vijë në ndihmë qytetarëve.
Gjithashtu, Meta tha se plani i Belind Këlliçit ka në qendër shëndetin dhe kujdesin ndaj qytetarëve.
“Belind Këlliçi ka një plan për të ndaluar agresionin e betonit kriminal në hapësirat publike, për të krijuar kudo në të gjitha zonat disa oaze të gjelbra, njëkohësisht edhe plani i tij për transportin urban është jo vetëm mbështetje për këtë shërbim për shtresat që kanë jetike këtë shërbim, por njëkohësisht për të përmirësuar trafikun dhe reduktuar ndotjen e qytetit. I gjithë plani i Belindit ka në plan të parë shëndetin dhe kujdesin ndaj qytetarëve që nga fëmijët e deri te të moshuarit. Ndërsa plani i këtyre është jep leje, kafsho parqet, kafsho oborret e shkollave dhe gjithçka vetëm për interesat e tyre të ndërtimit dhe pastrimit të parave“, tha ai.
