“Rilindja po shkatërron Sarandën”. Kështu çelet spoti i opozitës për lokalet e 14 Majit në Sarandë.
Në materialin video paraqiten raportime mediatike dhe deklarata të ekspertëve të kriminalistikës e gazetarëve që dëshmojnë mbretërimin e mafies në Sarandë.
“Në Sarandë komandon mafia e pushtetit vendor, e policisë dhe mafia lokale që kontrollon qytetin”, shprehet Arben Hajdarmataj, ish-Drejtues i Lartë i Policisë së Shtetit.
Tjetërsimi i bazës ushtarake sillet po ashtu në vëmendje.
Gjatë viteve 2014 – 2023, janë 8 të vrarë dhe 4 të zhdukur në Sarandë kujton opozita.
“Ka kaq shumë ngjarje në Sarandë vitet e fundit që nuk janë zbardhur sa po të raportojmë ne për këto ngjarje do përballemi me autorët e këtyre ngjarjeve dhe do na kërcënojnë”, është një pjesë e deklaratës së gazetarit të kronikës Spartak Koka gjatë një emisioni televiziv.
Spoti elektoral mbyllet me mesazhin: “Mafia po rrëmben pronat dhe jetët tona! Të shpëtojmë Sarandën. Qytetarë reagoni! Më 14 Maj votoni drejt”.