Blerja e votave nga “Rilindja” është një fenomen shqetësues i dokumentuar në çdo palë zgjedhje që janë zhvilluar në vend vitet e fundit. Grupet kriminale dhe pasunarët e vendit angazhohen gjatë periudhës së fushatës për ti ardhur në ndihmë zgjatjes së pushtetit të Edi Ramës, e për të përfituar më pas benefitet e angazhimeve të tyre.
Opozita e drejtuar nga ish-kryeministri Sali Berisha ka denoncuar se mekanizma të tilla ka nisur të aktivizohen nga mazhoranca edhe gjatë këtyre zgjedhjeve, megjithatë ka paralajmëruar se qytetarët e demokratët do tu japin përgjigjen e merituar dhe Rama do të dalë humbës nga procesi i 14 majit.
Denoncimi i fundit vjen nga kandidati i opozitës për Bashkinë e Kuçovës Lefter Maliqi, i cili shprehet se një prej atyre të cilësuar si një ndër oligarkët e preferuar të Ramës po financon blerjen e votave për socialistët.
Maliqi shprehet se Pëllumb Salillari ka hedhur miliona me porosi të veçantë që të blihen votat për Kreshnik Hajdarin, kryebashkiaku aktual të Kuçovës dhe kandidatin e “Rilindjes” për lokalet e 14 Majit. Ndërsa Hajdarin, e quan peng të Salillarit.
Në një postim në rrjetet sociale, ai ironizon duke u shprehur se Sallillari ka humbur, ndërsa janë gjetur milionat që ka hedhur për blerje votash.
“Thirrje urgjente banorëve të Kuçovës, opozitës së Bashkuar dhe socialistëve të ndershëm: Kush e sheh në rrugë apo kudo, personin në kërkim, ish-fatorinon, oligarkun e Qeverisë, darovitësin e kryebashkiakut Hajdar, Pëllumb Salillari, jeni të lutur të njoftoni familjen… sepse ka një muaj i humbur. Janë gjetur vetëm milionat që ka hedhur nëpër lokale, markete e shtëpira, me porosi të veçantë që të blihen votat për Hajdarin e tij peng. Ky i fundit është i shqetësuar se nuk i kanë mbetur më para për çakullin e gropave të rrugëve…”, shkruan Maliqi.
Lidhjet e Salillarit me Hajdarin janë të njohura, ndërsa një prej projekteve që ka përfituar biznesmeni nga Bashkia e Kuçovës ka përfunduar dhe në dyert e SPAK. 3.61 miliardë lekë të vjetra fitoi Salillari nga Bashkia e Kuçovës për ndërtimin e një ujësjellësi në Sinec, i kundërshtuar zëshëm nga banorët. Këta të fundit janë shprehur se tenderi i dyshimtë ka për qëllim shkatërrimin e burimit të Sinecit, një pasurie natyrore të paçmueshme në zonë.
Maliqi ka denoncuar edhe më herët Salillarin si figura e një mjeshtri kukullash që vë në lëvizje Hajdarin, ndërsa e ka paralajmëruar të mos përfshihet në blerje votash.
Disa javë më parë, në një emision televiziv, do të shprehej: “Oligarku që mbështet këtë është Pëllumb Salillari, të cilit i vajta një zyrë para një jave dhe i thashë si je kandidati për kryetar bashkie në Kuçovë, megjithëse nuk e pranon. Mbi 4 milionë euro dhe Sineci është në protestë. Kjo firmë po hedh rrugë asfalt mbi asfalt dhe rrugë aty ku po ndodhin vdekje. Janë bërë denoncimet në SPAK, por i them këtij oligarku të heqë dorë se do degjenerohet jo lekë të japë por të bëjë ç’të dojë. Të gjitha tenderat korruptivë, këta kanë varur xhaketën dhe janë tallur me socialistët. Ka ardhur koha e një ndryshimi të madh”.