Në prag të zgjedhjeve të 14 Majit, kur e gjithë administrata dhe punonjësit e bashkisë janë vendosur në dispozicion të fushatës së Emirjana Sakos dhe asfalti elektoral po hidhet në çdo rrugicë, duket se në problem real për Durrësin janë kthyer pirgjet e mbeturinave.
Në çdo cep të qytetit bregdetar, e veçanërisht në zonën e Arapajt para zyrës së shtabit elektoral të Sakos janë bërë “mal”, pavarësisht se bashkia Durrës paguan 9 milionë euro për inceneratorin e Tiranës.
“Pastruesja” siç e quajti Edi Rama në nisje të fushatës, Sakon, ka harruar që të pastrojë edhe mbeturinat që i zënë sytë çdo mëngjes teksa shkon të koordinojë të vetët për t’u kërkuar votën qytetarëve.
Pamjet e paprecedenta i ka publikuar kryetari i Partisë së Lirisë, Ilir Meta duke theksuar se Sako firmos e pashqetësuar, fët e fët gati 9 milionë euro nga taksat e durrsakëve.
Meta thotë se më 14 Maj, Durrësi pastrohet përmes ndryshimit dhe votës plebishitare për Igli Carën.
“As plehrat përpara zyrës të shtabit të saj elektoral nuk i pastron “pastruesja” e Edi Ramës, por me shpejtësinë e rrufesë firmosi fët e fët gati 9 milionë euro nga taksat e durrsakëve për të paguar inceneratorin e Tiranës, i cili ekziston vetëm në firmat dhe imagjinatën e Edi Ramës.
Në 14 Maj Durrësi pastrohet përmes Ndryshimit dhe votës plebishitare për Igli Carën”, shkruan Meta përkrah videos.
