Gjykata Themelore në Prishtinë ka vendosur të vazhdojë masën e paraburgimit edhe për dy muaj për pronarin e “Kobra City”, Dibran Hoxhajt dhe katër të pandehurit e tjerë, të dyshuar për vrasjen e të riut nga Kukësi, Visar Cengu.
Masa e paraburgimit për Kobrën dhe personat A.V, B.M dhe J.B, do të zgjasë deri më 3 korrik, ndërsa të pandehurit R.S., masa e paraburgimit do t’i zgjasë deri më datë 6 të po të njëjtit muaj.
Këtë e ka konfirmuar për Telegrafin, zyrtarja për informim e Gjykatës Themelore në Prishtinë, Mirlinda Gashi.
“Departamenti Special i Gjykatës Themelore në Prishtinë ka aprovuar kërkesën e Prokurorisë Speciale të Republikës së Kosovës, për vazhdimin e masës së paraburgimit kundër të pandehurve D.H, A.V, B.M dhe J.B, ashtu që masa e paraburgimit i është vazhduar edhe për 2 (dy) muaj, e cila masë do të llogaritet prej datës 03.05.2023 deri më datën 03.07.2023, ndërsa për të pandehurin R.S, masa e paraburgimit do t’i llogaritet prej datës 06.05.2023 deri më datën 06.07.2023”, thuhet në përgjigjen e Gashit.
Sipas Prokurorisë, Dibran Hoxhaj është nën akuzë për veprat penale “Vrasje e rëndë”, “Armëmbajtje pa leje” dhe “Manipulimi me prova”, ndërsa të dyshuarit e tjerë për veprat penale “Manipulim me prova” dhe “Pjesëmarrja në rrahje”.
Në kërkesën e Prokurorisë thuhet se me datën 3 janar 2023, rreth orës 04:00, në afërsi të lokalit të tij “Kobra City”, që gjendet në rrugën magjistrale Prizren- Zhur, Dibran Hoxhaj me armë zjarri qëllon me dashje duke i marrë jetën të riut nga Kukësit dhe duke plagosur mikun e tij Rufgen Shehu.
“Për shkak të një mosmarrëveshje paraprake që kishin pas rreth pagimit të faturës në lokal, fillon përleshja në mes punëtorëve në lokalin “Kobra City”, me të dëmtuarit ku pas kacafytjeve dhe rrëmujës së krijuar në lokal, të dëmtuarit dalin nga lokali dhe pasi hipin në veturën “Mercedes” FA 19-PFX, me targa angleze, për tu larguar në parkingun e lokalit, paraqitet i dyshuari Dibran Hoxhaj, i cili me armë zjarri shtënë në drejtim të veturës, me ç’rast e qëllon të dëmtuarin V.C, i cili kishte qenë i ulur në ulësen e pasme të veturës dhe R.Sh, i cili kishte qenë i ulur në ulësen e përparme, dhe si pasojë e këtyre të shtënave me armë zjarri V.C ndërron jetë rrugës për në Spitalin e Kukësit, derisa R.Sh nga plagët e marra nga Kukësi dërgohet në spitalin e Tiranës”, thuhet në kërkesën e Prokurorisë.
Me këtë, Hoxhaj dyshohet se ka kryer veprën penale “Vrasje e rëndë” sipas nenit 173, par.1, nënpar, 1.5 të Kodit Penal.
Sidoqoftë, dy ditë pas vrasjes së Visar Cengut, më 5 janar 2023, Instituti i Kosovës për Drejtësi (IKD) kishte publikuar analizën me titull “Dështimi i shtetit ndaj “Kobrës”. Edhe në analizën e IKD-së, të publikuar në shkurt të vitit 2022, ishte theksuar se Dibran Hoxhaj ka 16 aktgjykime dënuese të formës së prerë.
Ai reklamohej në media duke thënë se ka kryer 198 vepra penale që nga hapja e lokalit “Kobra City”.
Sipas IKD-së, në të gjitha këto raste, është paraparë mundësia e aplikimit të dënimeve më të ashpra ndaj tij, por se në asnjë prej tyre, Hoxhaj nuk është dënuar me burgim efektiv, edhe pse ishte përsëritës i veprave penale.
Për veprat penale për të cilat është dënuar Hoxhaj, dënueshmëria sipas ligjit ka shkuar deri në 10 vite burgim.
