Dashnor Sula është një nga deputetët e PD-së së Vulës, që është angazhuar në fushatën elektorale për zgjedhjet e 14 Majit, duke përkrahur kandidatët e dalë nga Primaret në qarkun e Elbasanit.
Teksa ka folur për zgjedhjet e 14 majit dhe mbështetjen e tij të plotë për kandidatët e “Primareve”, Sula tha në emisionin “Kafe Shqeto” se opozita ka shance reale që të fitojë me Luçiano Boçin në Elbasan, si dhe në Peqin apo Belsh.
“Jam në fushatë nga ora 8 e mëngjesit deri në 12 në natës. Jam ndër ato deputetë që asnjëherë nuk jam deklaruar kundër primareve në PD dhe kam deklaruar që mbështes kandidatët e primareve, sidomos për kandidatët e bashkive në Peqin, Belsh dhe Elbasan. Që nga dita e parë që u shpall Luçiano Boçi në Elbasan, mbas një ore kam bërë deklaratën në mbështetje të Luçiano Boçit. Qëndrimet e mia kanë qene të qarta në kuptimin që për gjënë e madhe për opozitën, demokratët dhe shqiptarët që kundërshtarë kemi mazhorancën, nuk kemi kundërshtarë vëllezërit tanë të foltores apo zotin Berisha”, tha Sula.
Ai gjithashtu e ka shprehur hapur kundërshtinë e tij ndaj veprimeve të Enkelejd Alibeajt si kryetar i komanduar dhe vendimit për t’u futur me kandidatë të vetët në disa nga 61 bashkitë e vendit.
Sula ishte i ashpër në qëndrim, duke e ka quajtur një thikë pas shpine për demokratët dublimin e kandidatëve demokratë në ato pak bashki ku janë fituar gjithmonë nga PD.
Sipas tij, Alibeaj ka çuar ujë në mullirin e PS-së, në një kohë që është kundërshtuar për vendimet nga 95% e grupit të deputetëve që mbështeste PD e Vulës.
“Grupi Parlamentar i PD, 95% kanë qene kundra dhe po u them, 3 apo 4 kandidatë e kanë mbështetur daljen me kandidatë. Mbas 30 prillit dhe Kuvendit të zotit Berisha dhe Komisioni i Rithemelimit, kishte vetëm dy rrugë, ose rruga që mos të kishin as vulë as sigël asgjë duhet të kishin krijuar dhe vendosur një kohë që të diskutohej që të mos vazhdohej përçarja e demokratëve.
Kur erdhi momenti që duhet të ishim të gjithë bashkë pas vendimit të 3 marsit të vendimit të Apelit, aty ndryshoj gjithçka sjella e këtyre personave. Dhe unë aty jam ndarë totalisht me këta persona. Argumenti i vetëm ishte që ne të kishim bashkimin e demokratëve për zgjedhjet e 14 majit dhe pas 14 majit pastaj të shikohej mundësia e bashkëpunimit dhe bashkimit të demokratëve. Gjë e cila zoti Alibeaj për mua ishte një ‘thikë pas shpine’ ndaj demokratëve pasi nuk do të duhej absolutisht që të mos kishim kandidatë të dubluar demokratë të opozitës”, theksoi ai.
Sipas Sulës, çdo pakënaqësi brenda demokratëve duhej lënë pas zgjedhjeve të 14 majit, pasi ata kundërshtarë kanë mazhorancën e PS-së dhe Edi Ramën.
“Deri në 14 maj ne duhet të përballeshim me mazhorancën e PS dhe në këtë mënyrë ne po çojmë ujë në mullirin e Ramës duke vendosur kandidatë që kanë 0 shance për të fituar përballë PS-së. Atëherë ti po i jep oksigjen Ramës në ato bashki si Vau i Dejës, rasti i Kamzës që janë të fitueshme dhe janë demokrate gjithmonë. Unë nuk jam dakord me këtë qëndrim dhe jam ndarë haptazi për këtë qëndrim. Pra në këtë moment unë nuk mund të pajtohem me asnjë figurë qoftë dhe Alibeaj të bëjmë rolin”, nënvizoi ai.
