Tirana, për të cilën garojnë më 14 Maj gjashtë kandidatë, përfshirë edhe kryebashkiakun aktual Erion Veliaj ka një mijë e një probleme për t’u trajtuar, që nisin nga betonizimi, korrupsioni nëpërmjet tenderave abuzivë e trafiku dhe vijojnë te ndotja, papunësia e lartë e të rinjve dhe rritja deri në kufijtë e të papërballueshmes, së kostos së jetesës.
Këto janë probleme reale, të cilat qytetarët ua kanë shprehur kandidatëve për kryebashkiakë në takimet e tyre dhe në përgjigje ndaj pyetjeve në disa sonazhe, por që siç duket nuk janë transmetuar siç duhet tek Roland Bejko, i përzgjedhuri i PD-së Vulës për “t’i rrëmbyer” bashkinë Erion Veliajt.
Me 8 vite në krye të qytetit, Veliaj ka lënë aq shumë hapësira për t’u kritikuar në mënyrën si ka menaxhuar bashkinë e Tiranës dhe po ashtu ka lënë të hapur mundësinë e paraqitjes së shumë projekteve e alternativave sfiduese nga rivalët, por Bejko mendon se mund ta fitojë garën me një premtim të padëgjuar më parë.
Në një takim me ish të përndjekurit politik, ku shihet në krah të Enkelejd Alibeajt, ai ka propozuar që t’ua shlyejë borxhin që PD sipas Bejkos i ka kësaj shtrese, duke e kthyer Burgun 313 në kryeqytet, në një muze.
“Në nder të tyre propozojmë që burgun 313, që ka shërbyer për të burgosur ish të përndjekurit politik, ne do e kthejmë në muze bashkë me vilën e diktatorit Hoxha”, shkruan Bejko përkrah kolazhit të fotove nga takimi që ndan në Facebook.
Me kuriozitet mbetet të shihet sesi do të ndihmojë muzeu që premton Bejko për këtë shtresë (edhe nëse zbatohet në rast fitoreje), e cila prej vitesh kanë ngritur zërin për dëmshpërblimin e plotë financiar, apo më shumë mbështetje nëpërmjet punësimit dhe angazhimit në jetën publike.
