Skënderbeu ka arritur objektivin sezonal për këtë edicion, ngjitjen direkt në Superiore për edicionin e ardhshëm.
Objektiv ky i arritur dy javë përpara mbylljes së sezonit. I gjithë ky sukses ka një emër dhe mbiemër, Ivan Gvozdenoviç.
Ky i fundit mund të quhet me plot gojë arkitekti i rilindjes së korçarëve, që në fund të vitit të kaluar dukeshin “të dështuar” sa i përket kalimit në Superiore.
Që prej datës 4 dhjetor 2022, kur Gvozdenoviç u ul në stolin korçar, filloi ringritja e ekipit në klasifikim, nga vendi i shtatë në të parin, atje ku vetëm një fitore i mban larg titullit kampion të kësaj kategorie.
Pa dyshim që merkatoja e studiuar dhe investimi nga presidenti janë faktorët e tjerë të këtij suksesi, por pa dyshim meritat e serbit janë të padiskutueshme.
Në 15 takime të luajtura me në krye Gvozdenoviçin, Skënderbeu ka mundur të marrë 10 fitore dhe 5 barazime, duke e mbajtur të paprekur kolonën e humbjeve.
Veç rezultateve edhe statistikat e golave janë të frikshme për korçarët. 25 gola të shënuar dhe vetëm 4 të pësuar tregon më së miri se trajneri i bardhekuqve e ktheu Skënderbeun në një makineri thuajse perfekte në këtë gjysmë sezoni.
Shifra të mjaftueshme këto që Takaj të “detyrohet” t’i ofrojë rinovimin. Rinovim tërësisht i merituar në fushë dhe jo përmes situatave të tjera. Këto rezultate i bëjnë presion Takajt, që t’i lerë dorë të lirë trajnerit serb edhe në Superiore.
Nga ana e tij, Gvozdenoviç është i qetë edhe pse ka shprehur hapur dëshirën për të drejtuar Skënderbeun edhe në Superiore.
Duke folur për “Panorama Sport”, trajneri i bardhekuqve nuk do të nxitojë duke ia lënë fundit të sezonit radhën e diskutimeve. Fillimisht kërkon ta mbyllë me triumf këtë kampionat, duke mbajtur 0 kolonën e humbjeve.
“Unë që pas ndeshjes me Turbinën e thashë se e dua rinovimin. Drejtimi i ekipit në Superiore do të më bënte krenar. Atje është habitati ynë natyral. Megjithatë, nuk dua të ngutem apo të vë në presion presidentin. Ne kemi marrëdhënie shumë të mirë dhe ju e dini sa korrekt është ai, mbi të gjitha me trajnerët. Kështu që jam i qetë. Për rinovimin dua të flas pasi të kem përmbyllur me sukses kampionatin. Na kanë mbetur dhe dy javë dhe dua që përqendrimi të jetë maksimal në këto dy ndeshje. Le të fitojmë titullin dhe të mbyllim pa humbje aventurën në këtë kategori për sezonin që kur unë jam në krye të ekipit. Me pas do të ulemi dhe do të flasim për gjithçka”, u shpreh i qetë Ivan Gvozdenoviç.
