Autori i golit të dytë të Tiranës, Bruno Lulaj, është i lumtur për rrjetën e shënuar ndaj Teutës dhe hapin e rëndësishëm të bërë drejt finales.
Në një prononcim për mediat së fundmi mbrojtësi i bardhebluve pohon se Tirana kërkon të bëjë tris këtë sezon.
“Jam shumë i lumtur, pasi sigurisht kemi marrë një rezultat shumë pozitiv për ndeshjen e kthimit. Na jep shumë besim për vazhdimësinë si për kampionat edhe Kupë, sepse si gjithnjë Tirana lufton në të dyja frontet. Normalisht jam i lumtur edhe për golin tim personal. I kemi të gjitha kualitetet dhe mundësitë për të luftuar në të dyja kompeticionet.
Jemi në rrugën e duhur dhe do t’i shkojmë deri në fund”, u shpreh fillimisht qendërmbrojtësi bardheblu. Për sa i përket kampionatit dhe mbrojtjes së titullit në derbi, ai thekson se do të ishte diçka ideale, por gjithsesi e mirëpret kurdo që të vijë.
“Kastriotin e vlerësojmë maksimalisht, do të japim maksimumin dhe të vazhdojmë ecurinë pozitive të javëve të fundit.
Do të ishte ideale në derbi të mbyllnim kampionatin në prani të tifozërisë sonë, por kurdo që të vijë është i mirëpritur”, përfundoi Bruno Lulaj. Lojtari erdhi si blerja e fundit në gusht për bardheblutë dhe po rezulton vendimtar për skuadrën kampione të Shqipërisë, e cila pritet të fitojë tre trofe këtë sezon futbollistik.
