Kostoja e jetesës në Shqipëri është rritur frikshëm nga pranvera e vitit të shkuar dhe çmimet e larta të ushqimeve kanë ndikuar në sjelljen konsumatore duke ulur ndjeshëm fuqinë blerëse.
Blerjet po orientohen drejt alternativave më të lira dhe mallrave në oferta, ndërsa kjo tendencë rrezikon ta çojë prodhimin në një spirale më të ulët të zinxhirit të vlerës dhe të ndikojë negativisht te produktiviteti.
Çmimet po rriten me ritmet më të larta të 25 viteve të fundit, ndërsa shtrenjtimi i produkteve kryesore të shportës ka bërë që shqiptarët, të cilët shpenzojnë për blerjen e ushqimeve 41.3% të të ardhurave mujore ta kenë më të vështirë për të blerë mishin apo bulmetin për t’a vendosur në tryezat e tyre.
Ndërkohë, edhe çmimet e frutave dhe perimeve duket se janë bërë të papërballueshme në çdo qytet të Shqipërisë.
Një e moshuar nga Berati teksa blinte produktet e ditës në një prej tregjeve të qytetit tha për emisionin “Good Morning Albanians”, se arriti të merrte vetëm patate, pasi lekët nuk i mjaftojnë që të marrë perime të tjera.
Ajo konstatoi edhe rritjen e frikshme që ka pësuar çmimi i qepës, ku blerja e një kilogrami është kthyer në luks për qytetarët.
Sakaq, tregtarët thonë se nga 70-80 lekë që ka qenë qepa e vendit shitet prej afro dy muajsh në 150 lekë/kg, ndërsa qepa e kuqe nga 90-100 lekë në 170 lekë/kg.
“Patate, një kile patate mora dhe do iki në shtëpi. Me 1000 lekë pension që marrim ne mirë janë çmimet, t’i marrim era dhe të ikim, mos t’i hamë. Ja patate kam marrë unë, këto do ha. Ça do marr tjetër. E pashë e çmimin e qepës, po s’merrja dot. Do ajo gjella me patate edhe qepë po aq lekë kisha”, tha e moshuara nga Berati.
