Ekzekutimi i Ardian Nikulajt mesditën e 19 prillit në ambientet e lokalit të tij po shkon drejt zbardhjes së plotë, teksa policia ka arritur të zbulojë ekzekutorin portugez Ruben Saraiva dhe 5 anëtarët e tjerë të grupit që organizuan vrasjen.
Pasi konkludoi hetimet duke zbuluar se gjakmarrja çoi Edmond Haxhinë drejt porositjes së vrasjes dhe “kontraktimit” të grupit të huaj të killerave për të eliminuar 50-vjeçarit, uniformat blu kanë arritur të gjejnë motorin që ka përdorur Ruben Saraiva.
Motori që ai përdori për t’ia mbathur nga vendngjarja dhe me të cilin humbi gjurmët pranë zonës së Gjadrit, është gjetur mesditën e sotme në fshatin Kakarriq, ku portugezi edhe ka qëndruar për dy muaj, që nga 19 shkurti kur hyri në Shqipëri.
Motori është gjetur në thellësinë e një përroi në zonën e Kakarriqit, ku janë bërë kërkime që nga mëngjesi i sotëm nga forcat RENEA dhe polumbarët.
Njoftimi i policisë:
Vijojnë veprimet e thelluara hetimore dhe kontrollet në terren, për sigurimin e të gjitha provave që shërbejnë për dokumentimin e plotë ligjor të autorësisë së vrasjes së kryer më 19 prill, në Shëngjin.
Si rezultat i hetimeve, informacioneve të siguruara dhe kontrolleve të imtësishme në terren të kryera nga shërbimet e Drejtorisë Vendore të Policisë Lezhë dhe forcat operacionale të Policisë së Shtetit, në afërsi të banesës së shtetasit të shpallur në kërkim E. H., në fshatin Kakarriq, shërbimet e Policisë gjetën dhe sekuestruan motomjetin e përdorur nga ekzekutori, për vrasjen e shtetasit Ardian Nikulaj.
Grupi i posaçëm hetimor vijon hetimet dhe veprimet në terren, në funksion të dokumentimin të plotë ligjor të kësaj ngjarjeje.
Ndërkohë, Policia e Shtetit është duke bashkëpunuar ngushtësisht me partnerët dhe agjencitë ligjzbatuese ndërkombëtare, për lokalizimin dhe kapjen e 6 shtetasve të shpallur në kërkim në lidhje me vrasjen e 51-vjeçarit Ardian Nikulaj.
