Kryebashkiaku socialist i Rrogozhinës, Edison Memolla është paraqitur paraditen e kësaj të enjteje në Prokurorinë e Posaçme Kundër Korrupsionit dhe Krimit të Organizuar (SPAK).
Ende nuk ka asnjë komunikatë zyrtare por burimet mediatike bëjnë me dije se Memolla do të japë “llogari” per punësime fiktive të personave që rezultonin se ishin jashtë vendit, ndërkohë që paguheshin si punonjës të Bashkisë.
Kujtojmë se më 7 Mars të vitit të kaluar Partia Demokratike do të kallëzonte në SPAK kreun e sapozgjedhur të Bashkisë Rrogozhinë, Edison Memollën, me akuzën e shit-blerjes së votave. Sipas akuzave nga PD-ja, Memolla ka qenë direkt i përfshirë në blerje votash.
Konkretisht, ai u akuzua se ka kërkuar nga punonjësit e Operatorit të Shpërndarjes së Energjisë Elektrike të japin votat për të në zgjedhjet e pjesshme të 6 marsit 2022.
Por, Memolla nuk përfaqëson të vetmin rast të abuzimeve nga kryebashkiakët socialistë. I pari në radhët e tyre që pati hesape të hapura me drtejtësinë dhe përfundoi në qeli ishte, Fatos Tushe, i cili drejtoi bashkinë e Lushnjës për dy mandate.
Fatos Tushe dhe 18 vartësit e tij në bashkinë e Lushnjës shkuan pas hekurave, pasi Gjykata e Posaçme kundër Krimit dhe Korrupsionit i dënoi me akuzën e “shpërdorimit të detyrës” referuar aferës së tenderave të kësaj bashkie.
Tushe do të qëndrojë në qeli 2 vite e 4 muaj pasi përfitoi nga gjykimi i shkurtuar, ndërsa SPAK kërkoi për të 5 vjet heqje lirie.
Ndërkohë, rreth nje muaj më parë në prag të shpalljes së kandidaturave për zgjedhjet lokale, kryebashkiaku i Bulqizës Lefter Alla, u arrestua me urdhër të SPAK pasi akuzohet po ashtu për abuzim me tenderat. Prokuroria e Posaçme bëri me dije se ka caktuar masën e sigurisë “arrest me burg” edhe për dhjetë zyrtarë të tjerë, si dhe dy punonjës janë lënë në “arrest shtëpie”, të cilët dyshohet se kanë abuzuar me tenderat për ujësjellësin, pasi kanë qenë anëtarë të komisioneve.
Sipas SPAK vlera e tenderit për të cilën akuzohet Alla kap shumën e 322.439.000 lekëve të reja, me afat kohor 10 mujor. Alla akuzohet se favorizoi një kompani për ndërtimin e ujësjellësit në lagjen e vjetër të Bulqizës, duke shkaktuar dëm të konsideruar në buxhetin e shtetit. Punimet janë kryer nga kompania, OE 2AF Albania shpk, lidhje shoqërore e kryetarit të Bashkisë.
Sakaq, Boldnews ka raportuar më herët shumë raste të tenderave korruptiv dhe abuzimeve me detyrën edhe për kryebashkiakun Erion Veliaj në Tiranë apo drejtuesit lokalë të PS në Durrës, Fier, Korçë, Elbasan, Berat etj.
Pra duket sikur shumica e të zgjedhurve lokalë të Partisë Socialiste janë të përfshirë në afera korruptive dhe abuzim me pushtetin, ku në sajë të prokurorimeve publike miliona euro të taksapaguesve shkojnë në xhepat e tyre dhe klientëve të përzgjedhur.
